Амэрыканскі Інстытут Гэлапа апублікаваў дасьледаваньне рэйтынгаў усясьветных лідэраў за 2019 год.
Гэлап, пачынаючы з 2007 году, штогод замярае папулярнасьць кіраўніцтва чатырох краін: ЗША, Расеі, Нямеччыны і Кітаю.
На першым месцы ў рэйтынгу, як і ў два папярэднія гады — Нямеччына, прадстаўленая канцлеркай Ангелай Мэркель. З ухвалай да кіраўніцтва Нямеччыны ставяцца ў сярэднім 44 адсоткі апытаных па ўсім сьвеце.
Злучаныя Штаты на другім месцы — 33 працэнты. Рэйтынг кіраўніцтва ЗША прыкметна абваліўся ў першы год прэзыдэнцтва Дональда Трампа, цяпер ён вырас, але нязначна.
Кіраўніцтва КНР ухваляе 32 адсоткі, Расеі — 30 адсоткаў.
Падчас дасьледаваньня гучала пытаньне, ухваляеце вы або не працу кіраўніцтва ЗША? Варта адзначыць, што Беларусь апынулася сярод 12 краінаў, у якіх падтрымка для сусьветнага лідэрства ЗША ў 2019 годзе вырасла болей чым на 10 працэнтных пунктаў у параўнаньні з папярэднім годам.
