Больш за 40 тысяч чалавек адгукнуліся на заклік штабу Валерыя Цапкалы абараніць свае подпісы, гаворыцца на афіцыйным сайце прэтэндэнта на найвышэйшую пасаду.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Ініцыятыўная група сабрала звыш 200 тысяч подпісаў, у выбаркамы здалі 160 тысяч. Аднак Цэнтарвыбаркам прызнаў толькі 75 тысяч, што недастаткова для рэгістрацыі кандыдатам у прэзыдэнты.
Валер Цапкала заявіў, што будзе змагацца за кожны забракаваны подпіс, заклікаўшы ўсіх падпісантаў зьвязацца са штабам праз сайт, Telegram або Viber-бота.
«Нашай камандай распрацаваны дакладны альгарытм, з дапамогай якога вы можаце вэрыфікаваць подпіс, пацьвердзіць, што вы ёсьць, даказаць сабе і ўсёй краіне, што нас на самай справе шмат», — заявілі ў штабе.
На гэты момант свае подпісы пацьвердзілі больш за 16 тысяч менчукоў, амаль 7,5 тысячы жыхароў Менскай вобласьці, 5,2 тысячы — Горадзенскай, 3,5 тысячы — Берасьцейскай, 2,8 тысячы — Гомельскай, 2,5 тысячы — Віцебскай.
Валер Цапкала заявіў, што не зьбіраецца выходзіць з прэзыдэнцкай кампаніі, незалежна ад рашэньня ЦВК аб рэгістрацыі.
Тым часам экс-кіраўнік Парку высокіх тэхналёгій заявіў, што абураны абвінавачваньнямі ў свой адрас з боку аднаго з былых партнэраў па бізнэсе і зьвярнуўся ў пракуратуру.
«Там інфармацыя па ўсіх ілжэсьведчаньнях, якія ён выносіць на публіку. Гэта гідкія інсінуацыі, ад якіх большасьць людзей проста нудзіць», — сказаў ён падчас відэаканфэрэнцыі.
Гаворка пра будаўніцтва дома ў сталічным мікрараёне Сьцяпянка, растлумачыў Валер Цапкала. Турэцкі бізнэсовец прапанаваў дапамагчы, аднак выканаў работы няякасна.
«Наколькі я ведаю, ён вельмі многіх людзей падмануў, у яго толькі па дзьвюх кампаніях каля 200 розных судовых пазоваў», — адзначыў Цапкала, заклікаўшы пацярпелых таксама зьвярнуцца ў пракуратуру альбо ў ягоны штаб.
У канцы чэрвеня МУС Беларусі пачало праверку супрацьпраўнай дзейнасьці Валера Цапкалы. Адпаведную заяву падаў грамадзянін Беларусі турэцкага паходжаньня Сэдат Ігдэджы, кампаніі якога ўдзельнічалі ў забудове тэрыторыі Парку высокіх тэхналогій (ПВТ) у той час, калі яго адміністрацыю ўзначальваў Цапкала.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
