Міністэрства ўнутраных спраў Беларусі праігнаравала сумесную заяву Беларускай асацыяцыі журналістаў і рэдакцый звыш 50 мэдыя з патрабаваньнем спыніць перасьлед за прафэсійную дзейнасьць, гаворыцца на сайце БАЖ.
У сваім адказе МУС спасылаецца на тое, што заяўнікі не прыклалі дакумэнтаў, якія пацьвярджаюць права асацыяцыі прадстаўляць інтарэсы калегаў. Кіраўніцтва БАЖ не разумее, што мае на ўвазе МУС, бо толькі 19 і 20 чэрвеня ў розных гарадах Беларусі пры выкананьні службовых абавязкаў затрымалі некалькі дзясяткаў журналістаў –сяброў арганізацыі.
Адзін з тых, каго затрымалі падчас працы, да гэтага часу адбывае 15-дзённы адміністрацыйны арышт у Баранавічах. Гэта апэратар выданьня «Ганцавіцкі час» Сяргей Багроў.
Іншы журналіст, Сяргей Лацінскі з Бабруйску, асуджаны на 10 сутак і таксама павінен будзе адбыць гэтае пакараньне за сваю працу.
Сярод затрыманых былі журналісты Свабоды Аляксандра Дынько і Андрэй Рабчык, якія вялі жывы відэарэпартаж са збору подпісаў у Менску 19 чэрвеня.
Разам з тым Беларуская асацыяцыя журналістаў ня страчвае надзею, што, нягледзячы на фармальны адказ, супольны зварот арганізацыі і больш чым 50 рэдакцый палепшыць стаўленьне работнікаў правапарадку да прадстаўнікоў прэсы.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
