Прэтэндэнт на пасаду прэзыдэнта, былы старшыня праўленьня «Белгазпрамбанку» Віктар Бабарыка ў онлайн-інтэрвію на партале Tut.by выказаўся за раўнапраўнае вывучэньне ў Беларусі трох моваў — беларускай, расейскай і ангельскай.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
«Я мару, каб большая частка беларусаў размаўляла як мінімум на трох мовах, — сказаў ён. — З майго пункту гледжаньня, самае правільнае — пабудова сыстэмы адукацыі, дзе тры мовы ў роўнай ступені пачынаюць ўводзіцца зь першай клясы. Трэба рыхтаваць выкладчыцкі склад, ўзмацняць яго».
Разам з тым экс-банкір перакананы, што трэба «адназначна выводзіць беларускую мову як асаблівасьць, адметную рысу нацыі беларусаў».
«Я, на жаль, ня так часта карыстаюся роднай мовай, але мне было б вельмі прыемна, каб за мяжой нас пазнавалі менавіта па беларускай мове», — растлумачыў ён.
Бабарыка заявіў, што неабходная падтрымка школаў дзеля навучаньня дзяцей беларускай мове, а таксама выступае за большую папулярызацыю беларускай культуры.
«Гэта працэс не аднаго дня, — канстатаваў прэтэндэнт на прэзыдэнцкую пасаду. — Не адзін дзень зьнішчалі беларускую мову, і вы хочаце, каб за адзін дзень хтосьці выправіў моўную сытуацыю? Я вельмі моцна спадзяюся на тое, што беларускамоўныя дзеячы культуры нейкім чынам дапамогуць гэтаму. Як? Паглядзім».
«Пытаньне мовы, сымболікі — гэта пытаньне заканчэньня першага тэрміну любога, хто прыйдзе ў гэтае крэсла. Пяць гадоў — дастатковы тэрмін. Пытаньне вырашалася б народным галасаваньнем, безумоўна», — адзначыў ён.
Пры гэтым на галасаваньні ў зьмене дзяржаўнай сымболікі сам Бабарыка застаўся б нэўтральным. На яго думку, роля прэзыдэнта ў гэтых пытаньнях павінна быць яднальнай, а выказаныя перавагі за адзін з варыянтаў адштурхнулі б тых, каму імпануе іншы.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
