Затрыманьні і суды па адміністрацыйных справах працягнуліся ў Беларусі 10 чэрвеня. Свабода публікуе сьпіс затрыманых і пакараных.
Максымальны штраф — 1080 рублёў
- У віцебскім судзе Чыгуначнага раёну Аляксандра Ільлінца аштрафавалі на 1080 рублёў за тое, што ён пастаяў 12 хвілін побач з плякатам «Свабоду Ціханоўскаму» на пікеце па зборы подпісаў за вылучэньне Сьвятланы Ціханоўскай.
- Лідзкі раённы суд прысудзіў чарговыя штрафы за стрым блогера Сяргея Ціханоўскага, які адбываўся ў Лідзе 22 красавіка. Так брат і сястра Станіслаў і Рэгіна Беркусы былі пакараныя штрафамі ў 405 і 135 рублёў.
Каго затрымалі?
- У Горадні затрымалі журналіста тэлеканалу «Белсат» Зьмітра Міцкевіча і апэратара Сяргея Кавалёва. Яны асьвятлялі пікет па збору подпісаў за вылучэньне кандыдатам на прэзыдэнта Аляксандра Лукашэнкі.
- У Менску затрымалі актывістаў грамадзянскай кампаніі «Эўрапейская Беларусь» Міхаіла Бандарэнку, Артура Клімовіча, Арцёма Чарняка і Дзьмітрыя Казлова.
Затрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:
ч. 1 арт. 293 (арганізацыя масавых беспарадкаў, да 15 гадоў зьняволеньня).
ч. 3 арт. 130 (распальваньне сацыяльнай варожасьці);
ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;
ч. 1 арт. 342 (арганізацыя дзеяньняў, што груба парушаюць грамадзкі парадак).
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.
