Менскі гарадзкі суд пакінуў у сіле рашэньне Генэральнай пракуратуры аб выдачы Турэччыне 27-гадовага курда Хіджры Мамаша. Пра гэта паведамляе праваабарончая арганізацыя Human Constanta, якая юрыдычна падтрымлівае маладога чалавека.
Суд прыняў рашэньне, разгледзеўшы скаргу Мамаша ў закрытым рэжыме. Той зьвярнуў увагу на неадпаведнасьць абвінавачаньня беларускаму крымінальнаму заканадаўству, на тэрміновасьць прынятай працэдуры і на пагрозы катаваньняў у выпадку яго выдачы.
Хіджры Мамаш праз пагрозы пераследу ўцёк з Турцыі ў Ірак, адтуль прыехаў у Армэнію. Летась у ліпені аформіў новыя дакумэнты, купіў авіяквіток празь Менск да Бялграду, аднак у Нацыянальным аэрапорце быў затрыманы і абвінавачваны ў падробцы пашпарта. Ад таго часу знаходзіцца ў сьледчым ізалятары.
Мамаш падаў заяву аб міжнароднай абароне, але Дэпартамэнт грамадзянства і міграцыі 5 лютага яму адмовіў. Суд Цэнтральнага раёну Менска 3 красавіка пакінуў рашэньне ў сіле. У тым жа месяцы намесьнік генпракурора Аляксей Стук задаволіў просьбу Міністэрства юстыцыі Турэччыны, дазволіўшы выдачу курда для прыцягненьня да крымінальнай адказнасьці за «замах на тэрытарыяльную цэласнасьць дзяржавы».
Мамаш сьцьвярджае, што не рабіў ніякіх злачынстваў на тэрыторыі Турэччыны, а перасьледуюць яго за ўдзел у мірных акцыях і агітацыі ўступаць у Народную дэмакратычную партыю.
30 траўня Human Constanta накіравала ў прэзыдэнцкую адміністрацыю некалькі сотняў подпісаў пад просьбай не выдаваць Мамаша і даць яму прыстанішча ў Беларусі. Аналягічны зварот 2 чэрвеня накіраваў у ведамства і сам курд.
