Бабарыка — на допыце, у яго дома — ператрус. ВІДЭА
Свабода вяла жывы рэпартаж ад дома сям'і Бабарыкаў у вёсцы Мачаны Лагойскага раёну і ад будынка ДФР у Менску на вуліцы Кальварыйскай.
«Пустым займаецеся». Качанава сустрэлася з чальцамі ініцыятыўных групаў альтэрнатыўных прэтэндэнтаў
У гарадзкой бібліятэцы Баранавічаў старшыня Савету Рэспублікі Нацыянальнага Сходу Натальля Качанава сустрэлася з чальцамі ініцыятыўных групаў альтэрнатыўных прэтэндэнтаў у кандыдаты. Як паведамляе «Наша Ніва», прысутнічалі каля 30 чалавек: зборшчыкі подпісаў са штабоў Віктара Бабарыкі, Валерыя Цапкалы, Сьвятланы Ціханоўскай, Андрэя Дзьмітрыева, апазыцыйныя актывісты.
«У Натальлі Іванаўны было некалькі пасылаў. Першы — такіх людзей, як Аляксандар Рыгоравіч, яна ў жыцьці ня бачыла, таму зь ім да канца. Другі — тых, хто не падтрымлівае Лукашэнку, вельмі мала, пустым займаецеся. І трэці пасыл — ніякіх фальсыфікацый не было», — падзяліўся з выданьнем адзін з удзельнікаў.
Калі ёй прапанавалі выйсьці на вуліцу і апытаць першыя дзесяць чалавек, за каго яны прагаласуюць, Качанава адмовілася: маўляў, незаконнае сацыялягічнае апытаньне. Цалкам чытайце па спасылцы.
«Надакучыла баяцца». Пікет салідарнасьці ў цэнтры Менску. УЖЫВУЮ
18 чэрвеня ў цэнтры Менску, каля Беларускай дзяржаўная філярмоніі на праспэкце Незалежнасьці, праходзіць супольны пікет прадстаўнікоў правацэнтрысцкай кааліцыі апазыцыі, які мае на мэце выказаць салідарнасьць зь Сяргеем Ціханоўскім, Паўлам Севярынцам, Міколам Статкевічам і іншымі затрыманымі падчас перадвыбарчай кампаніі ў Беларусі.
Па стане на 20:35 чарга расьцягнулася больш, чым на 1,8 кілямэтра. Свабода вядзе жывую трансьляцыю зь месца падзей.
Сын Віктара Бабарыкі знаходзіцца ў СІЗА КДБ
Сын патэнцыйнага кандыдата ў прэзыдэнты Віктара Бабарыкі і кіраўнік ягонага выбарчага штабу Эдуард Бабарыка знаходзіцца ў СІЗА КДБ. Пра гэта паведаміла ў Фэйсбуку дзяўчына Эдуарда Аляксандра Зьверава.
«Толькі што са мной зьвязаўся дзяжурны хтосьці і паведаміў, што Эдзік знаходзіцца ў СІЗА КДБ. Яго абвінавачваюць па артыкуле «ўхіленьне ад выплаты падаткаў», — напісала Аляксандра.
Затрыманьне Бабарыкі: чаму Лукашэнка перадумаў
Віктар Бабарыка ўсё ж затрыманы. Роўна праз тыдзень пасьля «наезду» на «Белгазпрамбанк». Чаму не адразу яго «пасадзілі» разам з двума дзясяткамі затрыманых калегаў па працы ў банку і сяброў? Чаму чакалі цэлы тыдзень? Піша палітычны аглядальнік Валер Карбалевіч.
«Працягнем працаваць, магчыма, яшчэ больш актыўна»: затрыманьне Бабарыкі пракамэнтавалі ў яго выбарчым штабе
У штабе Віктара Бабарыкі Свабодзе заявілі, што працягваюць працаваць у штатным рэжыме і паабяцалі заўтра зладзіць стрым і расказаць пра далейшыя пляны і стратэгію штабу.
«Мы працуем у штатным рэжыме. У нас ёсьць мэта, мы ўсталявалі рэкорд — 425 тысяч сабраных подпісаў. Больш за 200 тысяч подпісаў мы ўжо накіравалі ў ЦВК, і цяпер мы праводзім апрацоўку і вэрыфікацыю астатніх подпісаў. Магчыма, заўтра нам таксама ўдасца іх падаць — пры ўмове, што Віктара і Эдуарда адпусьцяць, таму што менавіта яны маюць права (у тым ліку) падаваць подпісы ў ЦВК», — распавяла Свабодзе прадстаўніца штабу Віктара Бабарыкі Марыя.
«Палітычнае месіва». Расейскі апазыцыянэр Навальны пра разгром Лукашэнкам сваіх апанэнтаў
Расейскі апазыцыянэр Аляксей Навальны прысьвяціў сваю праграму на канале YouTube # РоссияБудущего выбарам у Беларусі.
«Акурат цяпер ў Беларусі адбываецца „палітычнае месіва“ — з арыштамі, катаваньнямі, затрыманьнямі ўсіх без разбору, — адзначыў Навальны. — Масавая незадаволенасьць Лукашэнкам адбываецца адначасова на фоне эпідэміі, якую беларускі кіраўнік не прызнае як зьяву, і фактычнага разбурэньня эканомікі. Бо кожны аўтарытарны лідэр, які шмат-шмат гадоў ва ўладзе, дасягае таго пункту, калі эканоміка рассыпаецца. Адпаведна —рэзкае падзеньне ўзроўню жыцьця насельніцтва».ё
Апошні дзень збору подпісаў на выбарах у Беларусі — 19 чэрвеня. Што чакаецца далей
Да 19.00 19 чэрвеня выбарчыя камісіі Беларусі прымаюць подпісы за вылучэньне кандыдатаў у прэзыдэнты. Нават калі кандыдат здасьць 100 тысяч подпісаў, неабходных для вылучэньня, гэта яшчэ ня значыць, што кандыдата зарэгіструюць.
Старшыня Цэнтральнай выбарчай камісіі Лідзія Ярмошына 18 чэрвеня паведамляла, што ініцыятыўныя групы двух патэнцыйных кандыдатаў ужо здалі звыш 100 тысяч подпісаў: за Аляксандра Лукашэнку — 364 тысячы, за Віктара Бабарыку — каля 150 тысяч.
Пра збор неабходных 100 тысяч подпісаў раней заяўлялі таксама Валер Цапкала, Сяргей Чэрачань, Ганна Канапацкая і Андрэй Дзьмітрыеў. З выбараў зьняліся Алег Гайдукевіч і Натальля Кісель.
За вызваленьне Бабарыкі на Change.org падпісаліся 60 тысяч карыстальнікаў
Зварот «Патрабуем вызваліць Віктара Бабарыку» на сайце Change.org за 16 гадзінаў набраў каля 60 тысяч подпісаў. Адрозна ад зваротаў на сайце Petitions.by, улады не абавязаныя даваць адказ на гэтую пэтыцыю, а падпісваць яе могуць ня толькі жыхары Беларусі.
У звароце, які адрасуюць Аляксандру Лукашэнку, ураду, Вярхоўнаму суду і Камітэту дзяржаўнай бясьпекі Беларусі, патрабуюць вызваліць з-пад варты патэнцыйнага кандыдата ў прэзыдэнты Віктара Бабарыку, а таксама спыніць перасьлед яго родных, сяброў, чальцоў ініцыятыўных групаў і «любых грамадзянаў, якія падтрымліваюць яго ў ролі кандыдата на пасаду прэзыдэнта».
Штаб Бабарыкі падрыхтаваў да здачы 435 тысяч подпісаў. Гэта рэкорд для канкурэнтаў Лукашэнкі за ўвесь час
Штаб патэнцыйнага кандыдата ў прэзыдэнты Беларусі Віктара Бабарыкі паведаміў 19 чэрвеня, што за вылучэньне Бабарыкі сабралі, праверылі і падрыхтавалі да перадачы ў выбарчыя камісіі 434 985 подпісаў.
19 чэрвеня — апошні дзень, калі подпісы можна зьбіраць і падаваць у выбарчыя камісіі. Для рэгістрацыі кандыдата трэба сабраць мінімум 100 тысяч подпісаў, а штаб Бабарыкі паведамляе, што на 19 чэрвеня ў выбаркамы перадалі ўжо 283 тысячы.
Штаб заяўляе, што гэта рэкордная колькасьць подпісаў, сабраных за альтэрнатыўных кандыдатаў за ўсю гісторыю Рэспублікі Беларусь. Зянон Пазьняк у 1994 годзе сабраў 217 тысяч, Аляксандар Мілінкевіч у 2006-м — 198 тысяч, Сямён Домаг у 2001-м — 164 тысячы. Бабарыка меў таксама рэкордна вялікую для альтэрнатыўнага кандыдата ініцыятыўную групу — да яе далучыўся 9183 чалавекі.
У ініцыятыўнай групе Аляксандра Лукашэнкі, як сьцьвярджаецца, «звыш 11 тысяч чалавек», і за яго нібыта сабралі ўжо звыш 1,5 млн подпісаў.
Таболіч не сабраў 100 тысяч подпісаў і сышоў з выбарчай кампаніі
Музыка і майстар татý Алесь Таболіч падзякаваў сябрам, прыхільнікам і ўсім патрыётам Беларусі, якія паставілі свой подпіс у ягоную падтрымку на вылучэньне кандыдатам у прэзыдэнты. На гэтым кампанію завяршыў — каманда зрабіла шмат, але сабраць неабходныя 100 000 подпісаў не ўдалося.
«Шчыра кажучы, дастатковую колькасьць сабралі ўсяго некалькі кандыдатаў, астатнім дапамагаюць іхныя куратары, каб мець для ўлады спойлераў, — напісаў Алесь на сваёй старонцы ў Facebook. — Я тапіў за Беларусь і далей буду гэта рабіць. Я прыцягваў увагу да нацыянальнай культуры, адраджэньня і буду займацца гэтым надалей».
Пальчысу — яшчэ 15 дзён арышту. У Менску судзяць за пікеты, у тым ліку Барысава, Губарэвіча і жонку Статкевіча
Цягам 19 чэрвеня ў Менску праходзіць каля 20 судовых працэсаў паводле адміністрацыйных справаў за «парушэньне парадку арганізацыі і правядзеньня масавых мерапрыемстваў» (арт. 23.34 КаАП). Падсудным пагражае арышт або штраф да 1350 рублёў.
Суды зьвязаныя зь пікетамі для збору подпісаў за вылучэньне кандыдатаў у прэзыдэнты. Самыя пікеты легальныя, але на ранейшых судах сьведкі-міліцыянты заяўлялі, што падсудныя незаконна там мітынгавалі.
Інстытут сацыялёгіі: Інфармацыя аб рэйтынгу Лукашэнкі ў 3,8% — фэйк
Кіраўнік Інстытуту сацыялёгіі Акадэміі навук Беларусі Генадзь Коршунаў зьняпраўдзіў Свабодзе зьвесткі, якія распаўсюдзілі ў шэрагу СМІ са спасылкай на Інстытут сацыялёгіі Нацыянальнай Акадэміі навук.
У публікацыях прыводзілі наступныя лічбы:
- Віктар Бабарыка — 58,2%
- Сьвятлана Ціханоўская —20,4%
- Валер Цапкала — 15,7%
- Аляксандар Лукашэнка — 3,8%
Дырэктар Інстытуту сацыялёгіі Генадзь Коршунаў у размове са Свабодай зьняпраўдзіў гэтую інфармацыю. Лічбы распаўсюдзіў telegram-канал «Трикотаж», які ня мае нічога супольнага з інстытутам. У апублікаванай інфармацыі пісалі пра тэлефоннае апытаньне, але тэлефонныя апытаньні аб рэйтынгу «ня робяцца».
Былы трэнэр беларускіх гімнастаў: «Каб Лукашэнка меў сумленьне, адмовіўся б ад выбараў»
Заслужаны трэнэр Беларусі ў спартовай гімнастыцы Віктар Дайлідаў заявіў, што калі ў Аляксандра Лукашэнкі яшчэ засталося сумленьне, то ён мае сысьці.
«Я буду галасаваць за Віктара Бабарыку. Мне ён вельмі падабаецца. Здаецца, разумны і вельмі прыстойны чалавек. Нікога не абзывае, не абражае, кепскага слова нікому не сказаў. Я шмат пра яго чытаю, шмат гляджу. За яго падпісаўся», — прызнаўся спартовы адмысловец.
Гісторыю зь ператрусамі ў «Белгазпрамбанку» і ў доме Віктара Бабарыкі ён назваў ганебнай для ўладаў:
«Вы што, ня ведаеце, што Аляксандар Рыгоравіч усімі сіламі будзе трымацца за ўладу? Да апошняга. Я адчуваю, што ён ідзе на ўсё, каб утрымацца. На ўсё ідзе. Што гэта за „ветрадуі“, „майданутыя“. Ну як так можна? Гэта ж ён на сваіх людзей так кажа. Гэта ж твае жыхары Рэспублікі Беларусі! Многія цябе выбіралі, а цяпер ты іх так абражаеш».
Сьледзтва арыштавала нерухомасьць Віктара Бабарыкі і ягонага сына Эдуарда
Пакуль прэтэндэнта на найвышэйшую пасаду Віктара Бабарыку і кіраўніка ягонай ініцыятыўнай групы сын Эдуарда ўтрымліваюць у СІЗА КДБ, сьледчыя арыштавалі іх маёмасьць.
Напярэдадні ў жылых памяшканьнях Бабарыкаў правялі ператрус, а 19 чэрвеня наклалі арышт на два дамы ў вёсках Мачаны і Цна пад Менскам, а таксама на двухпакаёвую кватэру ў сталіцы. Такія захады ініцыяваў Дэпартамэнт фінансавых расьсьледаваньняў Камітэту дзяржаўнага кантролю, тэрмін абмежаваньняў ня вызначаны.
«Рэалізуецца сілавы сцэнар выбараў». Расейскія СМІ пра затрыманьне Бабарыкі і рэпрэсіі ў Беларусі
Расейскія мэдыя шмат увагі надаюць прэзыдэнцкай кампаніі ў Беларусі. У прыватнасьці, пішуць пра затрыманьне аднаго з галоўных канкурэнтаў дзейнага кіраўніка дзяржавы — былога старшыні праўленьня «Белгазпрамбанку» Віктара Бабарыкі.
- «Новая газета»: «Упершыню альтэрнатыўны кандыдат сабраў паўмільёна подпісаў»
- «Коммерсантъ»: «Допуск Бабарыкі да выбараў паламае ўвесь расклад уладаў»
- «Московский комсомолец»: «Арышт экс-банкіра азначае прызнаньне яго папулярнасьці»
- «Ведомости»: «Дзіўна падтрымліваць Лукашэнку пасьля таго, што ён нагаварыў»
«Нікому не дазволю зламаць гэтую краіну». Лукашэнка заявіў, што «сарваныя маскі зь лялек і лялькаводаў»
«Сёньня фокус усіх палітычных інтарэсаў сканцэнтраваны на Беларусі, — заявіў Лукашэнка, чарговым разам падкрэсьліўшы, што нікому не дазволіць зламаць краіну. — Як з Захаду, так і з Усходу. Назіраючы цягам апошніх сутак, я бачу, што актывізаваліся пэўныя сілы, якія пачынаюць разгойдваць сытуацыю ў краіне. Мы гэта назіралі, і даўно.
Але нам усё ж удалося зрабіць некаторыя крокі на апярэджаньне і сарваць маштабны плян дэстабілізацыі Беларусі (гэта ня жарт і ня запалохваньне) і нейкага Майдану. Такая была мэта. Маскі сарваныя з пэўных ня толькі лялек, якія ў нас тут былі, але і лялькаводаў, якія сядзяць за межамі Беларусі».
Як заявіў 19 чэрвеня генпракурор Беларусі Аляксандар Канюк, «дзеяньні фігурантаў справы «Белгазпрамбанку» стварылі рэальную пагрозу інтарэсам нацыянальнай бясьпекі Беларусі».
Дзяўчына Эдурада Бабарыкі: я і штаб просім ня ладзіць дэманстрацый, гэта можа нашкодзіць Віктару Дзьмітравічу і Эдзіку
Аляксандра Зьверава, дзяўчына Эдуарда Бабарыкі, пра яго затрыманьне даведалася раніцай 18 чэрвеня: ініцыятыўная група пра гэта напісала ў сваім чаце і апублікавала ў інфармацыю ў сацыяльных сетках. Потым зьявіліся навіны ў СМІ.
«Усё, што мне паведамілі, — гэта тое, што Эдуард затрыманы паводле артыкулу, які мае на ўвазе ўхіленьне ад выплаты падаткаў. Сказалі: „Можаце паглядзець на сайце, як яму можна нешта перадаць“. Гэта ўсё, што мне паведамілі».
«Тэлевізія не павінна валодаць такой інфармацыяй», — адвакат пра абвінавачаньне сяброўцы сям’і Бабарыкі
Сябру ініцыятыўнай групы і сяброўцы сям’і Віктара Бабарыкі Сьвятлане Купрэевай прад'явілі абвінавачаньне паводле часткі 2 артыкула 243 Крымінальнага кодэксу — ухіленьне ад сплаты падаткаў, спалучанае з нанясеньнем шкоды на суму ня менш за 8 950 222 рублі.
Празь дзяржаўныя тэлеканалы перадалі інфармацыю аб затрыманьні Віктара Бабарыкі і справе «Белгазпрамбанку». Паводле дзяржаўнага тэлеканалу АНТ, нібыта 12 чэрвеня 2007 года на Віргінскіх астравах была зарэгістраваная фірма Grreenbell Limited, сярод яе заснавальнікаў значыцца і Сьвятлана Купрэева.
«Я не магу камэнтаваць тое, што перадаюць у тэлевізіі, бо гэта не кампэтэнтны орган, які вядзе крымінальны працэс. Тэлевізія наагул не павінна валодаць такой інфармацыяй. Таму я ня ведаю, адкуль у іх такія зьвесткі, наколькі яны законныя і што гэта можа значыць. Мне ніхто не перадаваў ніякіх дакумэнтаў, каб я іх камэнтаваў», — сказаў карэспандэнту Свабоды адвакат.
Пра час, калі Лукашэнка казаў: «Я не прашу ў вас прэзыдэнцкі партфэль. Я хачу вярнуць вам веру ў будучыню». Піша Валянцін Жданко
Сёньня ў гэта цяжка паверыць, але наступныя словы належаць Аляксандру Лукашэнку:
«Ведаю — вас доўга падманвалі. Ведаю — вы стаміліся верыць.
Я не прашу ў вас прэзыдэнцкі партфэль. Я хачу вярнуць вам веру ў будучыню. Падумайце пра лёс вашых дзяцей. Я хачу запаліць хаця б маленькае сьвятло ў канцы тунэля, сьвятло надзеі ў вашых спакутаваных сэрцах».
Ну які ж гэта Лукашэнка? — запярэчыць мне дасьведчаны чытач. Калі мы за апошнія 26 гадоў чулі зь ягоных вуснаў нешта падобнае — узьнёсла-патэтычнае, нейкае нават экзальтаванае і наіўна-патаснае? Не ягоная гэта стылістыка, не ягоная лексыка, не ягоны характар. «Жэстачайшэ накланіць» — вось ягоныя словы, па якіх яго ведае і будзе доўга памятаць беларускі народ.