«Майданаў у Беларусі ня будзе». Лукашэнка сказаў кіраўніку КДБ, што «ведае, адкуль на нас дзьмуць вятры»
Аляксандар Лукашэнка 1 чэрвеня прыняў з дакладам старшыню КДБ Валерыя Вакульчыка і загадаў захоўваць пільнасьць у гэты няпросты час. «Мы ведаем, адкуль вятры дзьмуць на нашу беларускую зямлю, — выказаўся Аляксандар Лукашэнка. — На жаль, не з таго боку, адкуль хацелася б. Але мы гатовыя да любых вятроў».
«Заўсёды нас дзялілі на часткі, далучалі кавалкамі то да адной зямлі, то да другой. Вы ведаеце, што да мінулай вайны мы практычна былі падзеленыя. Таму сёньня гэтага дапусьціць нельга», — дадаў Лукашэнка. Цалкам чытайце па спасылцы.
Кандыдат у прэзыдэнты на выбарах-2010 Дзьмітры Вус падтрымаў сёлетніх «кандыдатаў пратэсту»
Дзьмітры Вус, кандыдат у прэзыдэнты на выбарах 2010 году, 31 траўня прыйшоў на пікет на менскай Камароўцы і расказаў Свабодзе, што прыйшоў туды падтрымаць Міколу Статкевіча, а таксама «ўсё жывое, што цяпер адбываецца».
«26 гадоў у нас будуецца рынкавы сацыялізм, — разважаў Дзьмітры Вус. — Перадвыбарчая кампанія Лукашэнкі зводзілася да таго, што 500 даляраў мусіць быць у кожнага працаўніка. За 26 гадоў гэта ня зроблена. Пасьля сельская гаспадарка мусіла быць паднятая — усё разбурана. Насельніцтва на мільён стала менш. Прыйшоў падтрымаць здаровы сэнс, каб не было гэткага. Рынкавы сацыялізм, які ён будуе, утопіяй атрымліваецца. Трэба рухацца, нешта новае рабіць». Цалкам чытайце па спасылцы.
«Ня вераць у сумленныя выбары, хочуць пераменаў». Як расейскія агенцтвы пішуць пра падзеі ў Беларусі
Расейскія інфармацыйныя агенцтвы пішуць пра збор подпісаў за прэтэндэнтаў на вышэйшую дзяржаўную пасаду ў Беларусі з сымпатыяй да апанэнтаў Лукашэнкі.
Статкевічу, Урбановічу, Вінярскаму — 15 сутак. Удзельнікаў пікетаў судзяць за «несанкцыянаваныя мерапрыемствы»
Удзень 1 чэрвеня ў Беларусі пачалі судзіць затрыманых у сувязі з пікетамі для збору подпісаў за вылучэньне кандыдатаў у прэзыдэнты. Хоць самі пікеты законныя, затрыманых судзяць паводле артыкулу за «несанкцыянаванае мерапрыемства» (23.34 КаАП РБ), піша «Вясна».
Лідэра «Народнай грамады» Міколу Статкевіча, лідэра «Маладога фронту» Дзяніса Ўрбановіча і актывіста «Эўрапейскай Беларусі» Максіма Вінярскага — пакаралі 15 суткамі арышту кожнага.
Актывіста Вітольда Ашурка зь Бярозаўкі аштрафавалі на 945 рублёў, менскага актывіста Яўгена Гормаша — на 1350 рублёў. Падрабязнасьці з судоў і новыя прысуды чытайце па спасылцы. Абнаўляецца.
Кіраўнік КДБ пра масавыя пікеты: «Нічога дзіўнага не адбываецца»
Нічога дзіўнага і нечаканага на фоне выбарчай кампаніі не адбываецца, заявіў старшыня КДБ Валеры Вакульчык. Ён адзначыў, што літаральна перад самай сустрэчай журналісты пацікавілася ў яго, ці ёсць нейкія асаблівыя ўмовы працы КДБ і службы супрацоўнікаў ва ўмовах падрыхтоўкі да выбараў.
«Нічога экстравагантнага, дзіўнага і нечаканага не адбываецца і не адбылося, — цытуе яго БелТА. — Пра ўсё, што цяпер адбываецца, мы ведалі. Адзінае, часам маюць месца тыя ці іншыя прыватнасьці». Цалкам чытайце тут.
Бабарыка падаў у ЦВК скаргу на Лукашэнку, прапануе адмовіць яму ў рэгістрацыі кандыдатам
Патэнцыйны кандыдат у прэзыдэнты Віктар Бабарыка 1 чэрвеня падаў у Цэнтральную выбарчую камісію заяву аб парушэньні заканадаўства на выбарах. На сваім сайце ён апублікаваў поўны тэкст звароту.
На што скардзіцца Бабарыка:
- прымус падпісвацца за вылучэньне Аляксандра Лукашэнкі кандыдатам у прэзыдэнты (сьпіс фактаў прымусу ён прыкладае ў дадатках да звароту);
- пагрозы «неспрыяльнымі» наступствамі або абяцаньні «спрыяльных» наступстваў у сувязі з подпісам за вылучэньне Лукашэнкі;
- удзел адміністрацыі ўстановаў у зборы подпісаў з падначаленых;
- заявы Лукашэнкі на Менскім трактарным заводзе 29 траўня, якія «безумоўна зьяўляюцца агітацыяй»;
- паклёп асабіста на яго з боку Лукашэнкі — заявы пра тое, што ён нібыта распаўсюджваў зманлівыя зьвесткі, і намёкі на тое, што ён выкарыстоўваў на выбарчую кампанію расейскія грошы;
- выказваньне Лукашэнкі, што ў Беларусі «Канстытуцыя не пад жанчыну».
«Пачаўся адваротны адлік, гэта падзеньне», — амэрыканскі паліттэхноляг пра затрыманьне Ціханоўскага і небясьпечнага для ўлады Бабарыку
Беларус Віталь Шкляраў, які працаваў у выбарчых кампаніях Абамы, Сандэрса, Сабчак і грузінскай апазыцыі, расказаў у інтэрвію Свабодзе, чаму галоўны паліттэхноляг Сяргея Ціханоўскага — гэта сам Лукашэнка, чаму лічыць, што ў кіраўніка Беларусі няма паліттэхнолягаў, і якім чынам Віктар Бабарыка стварае самую вялікую пагрозу для ўладаў.
Сьцісла:
- Сяргей Ціханоўскі ня ўпісваецца ў рамкі зразумелага, гэта анамалія, менавіта таму вакол яго ўзьнікае кансьпіралёгія.
- У Ціханоўскага няма ніякай паліттэхналёгіі. Чалавек проста езьдзіць і размаўляе зь людзьмі.
- Посьпех Ціханоўскага часткова абумоўлены каранавірусам і самай цяжкой сытуацыяй у гісторыі незалежнай Беларусі.
- Адміністрацыя прэзыдэнта, якая ня ўмее працаваць і 26 гадоў дзейнічае аднолькава, зрабіла ўсё для таго, каб зьявіўся Ціханоўскі.
- Праблема Лукашэнкі ў тым, што яго каманда не разумее, што такімі паводзінамі яны толькі дадаюць Ціханоўскаму сілы, а людзям настойлівасьці.
- Лукашэнка сваімі сваркамі з Крамлём сам дае зразумець людзям, што цар ужо ня той.
- З усіх кандыдатаў больш за ўсё падобны да Лукашэнкі Бабарыка. І ён — самы моцны ўдар па сыстэме Лукашэнкі.
Ці дапаможа Захад Ціханоўскаму?
Лукашэнка заявіў, што ў Беларусі ня будзе Майдана. Як на гэта адрэагуе Захад? Ці будуць на сёлетніх выбарах назіральнікі АБСЭ? Што азначае для Захаду адсутнасьць сёлета на выбарах у Беларусі выразнага празаходняга кандыдата? Якія «чырвоныя лініі» праводзіць Захад на сёлетніх выбарах для дзейнай беларускай улады, за якія дзеяньні яе чакаюць «пугі» і пазбаўленьне «пернікаў»?
Гэтыя пытаньні ў «Праскім акцэнце» абмяркоўваюць аглядальнікі Свабоды Юры Дракахруст і Сяргей Навумчык, а таксама экспэртка Беларускага інстытуту стратэгічных дасьледаваньняў Кацярына Шмаціна. Чытайце па спасылцы.
Замест «народ супраць Лукашэнкі» — «Крэмль супраць Лукашэнкі». Ці ўдасца кіраўніку Беларусі зламаць сцэнар выбарчай кампаніі?
Беларускі кіраўнік спрабуе перафарматаваць тэму выбарчай кампаніі. Цяперашняя схема «народ супраць Лукашэнкі» павінна ператварыцца ў «Крэмль супраць Лукашэнкі». І ўсе праціўнікі беларускага лідэра аўтаматычна ператвараюцца ў агентаў Масквы, калябарантаў і здраднікаў, разважае ў новым блогу аналітык Свабоды Валер Карбалевіч. Чытайце па спасылцы.
«Колькі ж ён будзе нас мучыць?» 78-гадовая лідзянка пра Лукашэнку і Ціханоўскага. ВІДЭА
У Лідзе 30 траўня выстраілася вялікая чарга да пікету патэнцыйнай кандыдаткі ў прэзыдэнты Сьвятланы Ціханоўскай. У чарзе адна з удзельніц, 78-гадовая жанчына, расказала Свабодзе пра сваё стаўленьне да Лукашэнкі, Ціхноўскіх і затрыманьняў.
195 затрыманых, 719 сутак арышту, больш за 60 тысяч рублёў штрафаў і — перасьлед беларусаў за травень у лічбах
Травень адзначыўся новай хваляй рэпрэсій над актывістамі, журналістамі, праваабаронцамі і грамадзянамі, якія прыходзілі на мірныя сустрэчы аднадумцаў у шматлікіх гарадах краіны, піша праваабарончы цэнтар «Вясна». Такія фактары, як пачатак выбарчай кампаніі, затрыманьне папулярнага блогера Сяргея Ціханоўскага пацягнулі за сабой акцыі пратэсту, на якія ўлады адказалі шматлікімі затрыманьнямі.
Статыстыка затрыманьняў за травень, паводле інфармацыі, якой валодалі праваабаронцы на 1 чэрвеня:
- У пэрыяд з 6 да 31 траўня па палітычных матывах затрымалі як мінімум 195 чалавек.
- Праваабаронцам вядома пра 217 выпадкаў адвольных затрыманьняў — 18 чалавек за гэты пэрыяд затрымлівалі па 2 ці нават па 3 разы.
- Цягам траўня прайшло каля 155 судоў па палітычна матываваных адміністрацыйных справах у адносінах да як мінімум 132 чалавек. Зь іх больш за 135 судоў — за ўдзел у несанкцыянаваных масавых мерапрыемствах (арт. 23.34 КаАП).
- За травень 72 чалавек агулам аштрафавалі на 63 504 рублі.
- Найбольшы штраф атрымаў берасьцейскі актывіст Віталь Казак. Па выніках 2 судоў па 4 пратаколах ён мусіць заплаціць 3780 рублёў (140 базавых велічынь) штрафу за ўдзел у акцыях супраць акумулятарнага завода.
- 69 чалавек былі арыштаваныя на тэрміны ад 2 да 25 сутак, агулам на усіх — 719 сутак.
- Адміністрацыйныя суды за гэты пэрыяд прайшлі ў 22 гарадах краіны, сярод якіх Менск, Віцебск, Гомель, Бабруйск, Магілёў, Ворша, Паставы, Полацак, Наваполацак, Мёры, Шаркаўшчына, Глыбокае, Вялейка, Маладэчна, Слуцак, Горадня, Ліда, Берасьце, Пінск, Мазыр, Жлобін, Мар’іна Горка. Больш за ўсё судоў прайшло ў Менску, Магілёве і Берасьці.
- Некалькі актывістаў, сярод якіх блогеры Сяргей Ціханоўскі, Уладзімер Няронскі, актывісты Юры Ўласаў, Станіслаў Паўлінковіч і журналіст Міхаіл Аршынскі, былі двойчы ці тройчы асуджаныя на новыя «суткі». Не пазьбеглі арыштаў і магілёўскія праваабаронцы «Вясны» Аляксандар Буракоў і Саша Райкан, а таксама журналісты Міхаіл Аршынскі, Зьміцер Лупач і Алесь Асіпцоў. Алесь Асіпцоў 10 сутак зьняволеньня трымаў галадоўку.
Бабарыка: сабралі амаль 100 тысяч подпісаў, мэта — мільён
Патэнцыйны кандыдат у прэзыдэнты, былы кіраўнік Белгазпрамбанку Віктар Бабарыка заявіў вечарам 1 чэрвеня на Facebook, што за ягонае вылучэньне сабралі амаль 100 тысяч подпісаў, «шчыльна наблізіліся» да гэтых лічбаў.
«Але я ўпэўнены: мы можам значна больш! Нашая мэта — 1 000 000, — піша Бабарыка. — У нас наперадзе яшчэ два тыдні і ўсяго 9 крокаў. Крок — 100 тысяч».
За Бабарыку зьбіраюць подпісы ня толькі на пікетах, але і «ў стылі Uber», як ён гэта называе: абяцаюць, што да таго, хто пакіне заяўку, адрасна прыедуць зьбіральнікі.
Для рэгістрацыі кандыдата ў прэзыдэнты трэба сабраць 100 тысяч подпісаў. Звычайна патэнцыйныя кандыдаты стараюцца сабраць больш, бо пэўную частку подпісаў адбракоўваюць праз памылкі ў падпісных лістах. Збор подпісаў праходзіць ад 21 траўня да 19 чэрвеня.
Іншыя штабы ў апошнія дні паведамлялі пра такія лічбы: Цапкала — амаль 50 тысяч на 1 чэрвеня, Чэрачань — 41 тысяча на 31 траўня, Канапацкая — 30 тысяч на 31 траўня.
Праваабаронцам сталі вядомыя прозьвішчы затрыманых паплечнікаў Сяргея Ціханоўскага
Увечары 1 чэрвеня скончыўся трохдзённы тэрмін ад моманту затрыманьня блогера Сяргея Ціханоўскага і 7 ягоных паплечнікаў у Горадні. Усіх іх затрымалі ў межах крымінальнай справы за гвалт у дачыненьні да супрацоўнікаў міліцыі (арт. 364 Крымінальнага кодэксу), яны знаходзяцца ў менскім ізалятары на Акрэсьціна.
Пасьля сканчэньня трох сутак на волю ніхто ня выйшаў, з чаго праваабаронцы «Вясны» робяць выснову, што тэрмін утрыманьня пад вартай падоўжаны да 10 сутак. Цягам гэтага часу ім мусяць прад’явіць абвінавачаньні або вызваліць.
29 траўня у Горадні падчас правядзеньня пікету ў зборы подпісаў грамадзянаў за прэтэндэнтку на найвышэйшую пасаду Сьвятлану Ціханоўскую супрацоўнікамі міліцыі быў затрыманы кіраўнік ініцыятыўнай групы, блогер YouTube канала «Страна для жизни» Сяргей Ціханоўскі і яшчэ як мінімум 15 чалавек.
Сьпіс затрыманых у межах крымінальнай справы паводле арт. 364 КК Беларусі:
1. Ціханоўскі Сяргей
2. Разьнічэнка Яўген
3. Фурманаў Зьміцер
4. Навумік Уладзімер
5. Ушак Вяргілій
6. Арановіч Аляксандар (верагодна)
7. Калмыкоў Сяргей
Праваабаронцы ўдакладняюць імя і прозьвішча яшчэ аднаго фігуранта. Таксама высьвятляецца, у межах якой канкрэтна крымінальнай справы затрыманы Арцём Сакаў.
У гэтай кампаніі Лукашэнка ўжо не зьяўляецца самым прарасейскім палітыкам, — палітоляг
Палітоляг Валер Булгакаў расказвае, які ўдар нанесьлі па сыстэме сваім вылучэньнем Цапкала і Бабарыка, зазначае, што эліты прадчуваюць канец палітычнай эпохі Аляксандра Лукашэнкі, і прадказвае, якім будзе выбарчы слоган кіраўніка дзяржавы.
Сьцісла:
- Зыходзячы з розных супярэчлівых заяваў Віктара Бабарыкі, я не сумняюся, што ён мог бы падпісаць тую самую 31-ю дарожную мапу.
- Вылучэньне Цапкалы і Бабарыкі — сур’ёзны ўдар па сыстэме кансалідаванага аўтарытарызму Лукашэнкі.
- Назіраецца разрыў, разлом сярод элітаў, бо яны адчуваюць блізкі заход палітычнай эпохі Лукашэнкі.
- Ня думаю, што ў маштабах краіны фэномэн Ціханоўскага можа стварыць электаральную рэвалюцыю.
- Цяпер Лукашэнка прэзэнтуе сябе як палітыка, які ня дасьць Беларусі быць паглынутай з Усходу.
ЦВК акрэдытавала 557 назіральнікаў на выбары, дамінуюць праўладныя вылучэнцы
На прэзыдэнцкія выбары акрэдытавалі 557 нацыянальных назіральнікаў, паведамляецца на сайце Цэнтарвыбаркаму. За апошні тыдзень іх колькасьць узрасла больш як на 200 чалавек, у абсалютнай масе за кошт праўладных арганізацый.
Ад грамадзян, якія падавалі заявы на акрэдытацыю ў якасьці назіральнікаў, зарэгістравалі 28 чалавек, ад працоўных калектываў — 2, ад палітычных партый — 35, ад грамадзкіх аб’яднаньняў — 492.
З палітычных партый найбольшая колькасьць назіральнікаў зарэгістраваная ад Камуністычнай партыі Беларусі — 29. Ад Сацыял-дэмакратычнай партыі народнай згоды — 3, ад Рэспубліканскай партыі працы і справядлівасьці — 2, ад Партыі БНФ — 1.
Сярод грамадзкіх аб’яднаньняў найбольшая колькасьць назіральнікаў акрэдытавалі ад БРСМ — 131. Ад Фэдэрацыі прафсаюзаў Беларусі — 113, «Белай Русі» — 85, Беларускага саюзу жанчын — 51.
Ад Беларускага Хэльсынскага камітэту акрэдытавана 39 назіральнікаў, ад Беларускага аб’яднаньня вэтэранаў — 41, ад Беларускага фонду міру — 16, ад БНФ «Адраджэньне» — 1.
Цапкала выказаў стаўленьне да акумулятарнага заводу, «Табакерак» і нацыянальнай сымболікі
Прэтэндэнт на пасаду прэзыдэнта Валер Цапкала 1 чэрвеня пабываў у Берасьці разам з жонкай Веранікай і сустрэўся з гараджанамі на сваім пікеце на вуліцы Савецкай.
Адной з цэнтральных тэм сустрэчы стаў акумулятарны завод, які будуецца пад Берасьцем. На думку Валера Цапкалы, для ўсіх шкодных вытворчасьцяў варта адводзіць прамысловую «зону адчужэньня» ўдалечыні ад населеных пунктаў.
Аплядысмэнты ў прысутных выклікала пазыцыя прэтэндэнта да кіёскаў «Табакерка»: «Усё ... адразу ж зьнесьці... Мы за спорт і здаровы лад жыцьця ці за „Табакеркі“?!»
Выказаўся Цапкала і пра дзяржаўную сымболіку:
«Першае, што я зраблю — гэта дазволю карыстацца дзьвюма сымболікамі. Хто хоча — хай вывешвае бел-чырвона-белы з акна. Хто хоча — вывешвае цяперашні беларускі сьцяг. Калі ўладальнік запраўкі зьяўляецца прыхільнікам бел-чырвона-белай сымболікі — стаў. Іншы ўладальнік запраўкі хоча паставіць чырвона-зялёны сьцяг — стаў. Другое, што я прапаную, — гэта правесьці грамадзкую дыскусію ў гэтым пытаньні, у якой я буду цалкам знаходзіцца ў кільватэры. Гэта значыць, я ня буду ўмешвацца. А пасьля абмеркаваньня правядзём рэфэрэндум».
Былы міліцыянт заявіў, што яго прынялі за аднаго зь «людзей у цывільным» і закідалі ў сацсетках пагрозамі
Нараджэнец Пінску, які працуе ў Менску кухарам, 22-гадовы Ягор Пузынін расказаў Tut.by, што яго памылкова пазналі як аднаго з удзельнікаў затрыманьняў на пікеце Сяргея Ціханоўскага ў Горадні.
Паводле Пузыніна, у адным з Telegram-каналаў зьявіліся зьвесткі пра тое, што ён быў адным зь міліцыянтаў у цывільным адзеньні. Пасьля ягоныя сацсеткі завалілі абразамі і пагрозамі, «за дзесяць хвілін прыйшло звыш ста паведамленьняў». Акрамя яго, сьцьвярджае Пузыкін, пісалі і ягоным знаёмым, яго маці.
Яшчэ 30 траўня ён разам з маці падаў заяву ў міліцыю — кажа, «справай заняўся СК», распачаў крымінальную справу.
У Віцебску прыхільнікаў Ціханоўскага аштрафавалі агулам на 2430 рублёў
У Віцебску 1 чэрвеня прайшлі суды над прыхільнікамі блогера Сяргея Ціханоўскага. Іх абвінавацілі ва ўдзеле ў несанкцыянаваным пікетаваньні з выкарыстаньнем плякату «Свабоду Ціханоўскаму!» і выявы перакрэсьленага таракана.
Вынікі судоў:
- Алег Баразна — штраф 1080 рублёў.
- Эдуард Плюсьнін — штраф 540 рублёў
- Аляксей Саламаненка — штраф 810 рублёў.
Як выглядалі чэргі да пікетаў у розных гарадах Беларусі. ВІДЭА
Практычна па ўсёй Беларусі людзі становяцца ў шматгадзінныя чэргі да пікетаў, каб падпісацца за прэтэндэнтаў на найвышэйшую пасаду.
«Яна ня мела іншага выйсьця». Знаёмая ўдзельніцы затрыманьня Ціханоўскага расказвае пра ціск міліцыі на асуджаных за прастытуцыю
Блогера Сяргея Ціханоўскага затрымалі ў Горадні ўвечары 29 траўня. За некалькі хвілін да затрыманьня ў кадры стрыму трапіла жанчына ў масцы, якая настойліва патрабавала ад Ціханоўскага адказаць на яе пытаньні. Пасьля таго, як блогер адмовіўся размаўляць зь ёй, зьявіліся міліцыянты. Неўзабаве ўсчалася штурханіна, у выніку якой адзін зь міліцыянтаў упаў на асфальт, а Сяргея Ціханоўскага і шэраг яго паплечнікаў затрымаў АМАП.
Жанчыну, якая патрабавала ад Ціханоўскага адказаў, карыстальнікі інтэрнэту знайшлі ў той жа вечар. Пад акаўнтамі Алены К. у сацсетках адразу ж зьявілася мноства крытычных камэнтароў. Карыстальнікі інтэрнэту таксама знайшлі фатаздымкі Алены на так званых «сайтах для дарослых». Са Свабодай зьвязалася Натальля, якая сьцьвярджае, што ведае Алену. А таксама разумее, чаму тая стала ўдзельніцай гісторыі з затрыманьнем Сяргея Ціханоўскага. Артыкул цалкам чытайце па спасылцы.