63-гадовага ўладыку Гурыя (сьвецкае імя — Мікалай Апалька) шпіталізавалі з падазрэньнем на каранавірус, ён у рэанімацыі.
Паводле «Газеты Слонімскай», Гурыю стала кепска падчас велікоднай службы. У яго запаленьне лёгкіх і падазрэньне на каранавірус. Выданьне спасылаецца на благачыннага Слонімскай акругі айца Вадзіма.
Прэс-сакратар Беларускай праваслаўнай царквы Сяргей Лепін у камэнтары «Нашай ніве» пацьвердзіў, што Гурый сапраўды знаходзіцца ў бальніцы. Ён адзначыў, што ня ведае прычыну, а калі б і даведаўся, то не сказаў бы з этычных перакананьняў.
Гурый адначасова зьяўляецца рэктарам Менскай духоўнай сэмінарыі, якая разьмяшчаецца ў Жыровічах у Слонімскім раёне. Яму 63 гады, ён родам з Полацкага раёну. Япіскапам у Наваградку стаў у 1996 годзе.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
