Праект акумулятарнага заводу «АйПауэр» атрымаў станоўчае заключэньне дзяржаўнай экалягічнай экспэртызы, паведамляе БелаПАН са спасылкай на прэс-службу Групы кампаній 1AK-GROUP, у якую ўваходзіць «АйПаўэр».
Станоўчае заключэньне зацьверджана 8 красавіка загадам Рэспубліканскага цэнтру дзяржаўнай экалягічнай экспэртызы і павышэньня кваліфікацыі кіраўнікоў і спэцыялістаў Мінпрыроды.
У паведамленьні 1AK-GROUP гаворыцца, што дзяржаўная экалягічная экспэртыза ўстанавіла «адпаведнасьць плянаваных праектных і іншых рашэньняў, якія зьмяшчаюцца ў будаўнічым праекце, патрабаваньням заканадаўства аб ахове навакольнага асяродзьдзя i рацыянальным выкарыстаньнi прыродных рэсурсаў».
У ліпені 2019 праект акумулятарнага заводу атрымаў адмоўнае заключэньне дзяржаўнай экалягічнай экспэртызы; у жніўні праектную дакумэнтацыю паўторна падалі на дзяржаўную экалягічную экспэртызу, але пазьней кампанія адклікала дакумэнты «з прычыны неабходнасьці ўсебаковага і больш поўнага адлюстраваньня інфармацыі аб унесеных зьменах».
24 лютага 2020 году праектную дакумэнтацыю акумулятарнага заводу пасьля карэктаваньня зноў падалі на дзяржаўную экалягічную экспэртызу.
Дзяржаўная экспэртыза — адзін з крокаў на шляху запуску заводу. Наступны этап — выпрабаваньні змантаванага абсталяваньня, сыстэм водазабесьпячэньня, каналізацыі, ацяпленьня, вэнтыляцыі і інш.
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.
