Лукашэнка загадаў забясьпечыць запас нафты і паліва на непрадбачаныя выпадкі

07 красавік 2020, 11:33

Аляксандар Лукашэнка даручыў стварыць сур’ёзны запас нафты і паліва на непрадбачаныя выпадкі. Пра гэта ён заявіў на нарадзе аб пастаўках нафты ў Беларусь, перадае БелТА.

«На непрадбачаныя выпадкі неабходна стварыць сур’ёзны запас сыравіны (як нафты, так і паліва), які дазволіць не парушаць працы асобных галінаў і не перарываць тэхналягічныя працэсы», — заявіў ён.

Чальцы ўраду і кіраўнікі рэгіёнаў атрымалі загад забясьпечыць магутнасьці для захоўваньня нафты і запасаў нафтапрадуктаў.

Падзеі, якія адбываюцца ў сьвеце, патрабуюць самых апэратыўных захадаў. Часу на перапіску, развагі і ўзгадненьні няма, перакананы Аляксандар Лукашэнка.

Пра картэльную змову

«Нафтавы рынак трасе, і нават празьмерна. Яго каньюнктура абсалютна непрагназаваная, валятыльнасьць шалёная. Задача такіх краін, як наша, — быць гатовымі да любога разьвіцьця падзеяў. А лепш — у найменшай ступені залежаць ад нафтавых гульняў буйных дзяржаў», — падкрэсьліў ён.

Лукашэнка заявіў, што такія дзяржавы нават ня ўтойваюць, у якія гульні гуляюць і якія мэты перад сабой ставяць.

«Яны ўжо наўпрост пачынаюць казаць і гуляць на павышэньне цэнаў на нафту. У наяўнасьці картэльная змова. Ідуць вось гэтыя „ігрышчы“. На жаль, на ўсё гэта мы паўплываць ня можам. Нават пандэмія і псыхоз на іх ніяк не ўплываюць. Вочы ва ўсіх „пазелянелі“, калі адчулі падзеньне даходаў».

ГЛЯДЗІЦЕ ТАКСАМА:

Лукашэнка даручыў «запоўніць нафтасховішчы», пакуль нафта танная

Ад пачатку году Беларусь сутыкнулася з праблемамі пастаўкі нафты з Расеі, больш за тры месяцы пытаньне не ўдавалася ўрэгуляваць. Толькі нядаўна бакі заявілі, што прыйшлі да паразуменьня. Мяркуецца, што ў красавіку беларускія НПЗ будуць працаваць з поўнай загрузкай, дзякуючы ў тым ліку альтэрнатыўным пастаўкам сыравіны праз порты Клайпеды і Адэсы.

ГЛЯДЗІЦЕ ТАКСАМА:

Расейская нафта пайшла ў Беларусь у буйных аб'ёмах пасьля 100 дзён перапынку

Расея спыніла пастаўкі нафты ў Беларусь. Што здарылася

1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
Прыняты толькі «індыкатыўны балянс»: Расея можа паставіць 24 млн тонаў нафты на год. У 2019-м столькі і паставілі: 18 млн т пайшлі на перапрацоўку, яшчэ 6 млн т на «перамытненьне». Паводле эканаміста Яраслава Раманчука, Беларусі на ўласныя патрэбы хапае 6–7 млн тонаў — астатняе ішло на нафтапрадукты для экспарту або на «перамытненьне».
31 сьнежня 2019 году Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
Пакуль Мазырскі НПЗ пачаў атрымліваць нафту толькі ад кампаніі расейскага алігарха Гуцэрыева — чакаецца пастаўка ўсяго 750 тысячаў тонаў.
Беларусь дамовілася пра імпарт 80 тонаў нарвэскай нафты Johan Sverdrup з пастаўкай у літоўскі порт Клайпеда. У Беларусі чакаюць пачатку разгрузкі ўвечары 22 студзеня. Перавалка і транспарт да НПЗ чыгункай будуць каштаваць больш за 20 даляраў за тону.
Гатоўнасьць транспартаваць нафту ў Беларусь на пастаяннай аснове ўжо выказалі суседнія Латвія (магчымыя аб’ёмы не абвяшчаліся) і Літва (да 3 млн тонаў на год). Пры чым Літва гатовая дастаўляць і газ. Па стане на 21 студзеня «Белнафтахім» мае «практычна гатовыя кантракты» на альтэрнатыўныя пастаўкі.
Беларускія НПЗ у першай палове студзеня працавалі на леташніх запасах, аб’ёму якіх хапала прыкладна на 20 дзён працы. Экспарт нафтапрадуктаў Беларусь часова прыпыняла ад 1 студзеня, аднавіла ад 21-га.
Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
Публічна ж Лукашэнка 21 студзеня паставіў задачу зьнізіць пастаўкі нафты з Расеі да 30-40% ад неабходных аб’ёмаў: «працэнтаў 30 мы павінны з Балтыкі завозіць і працэнтаў 30 праз Украіну». Пастаўкі з Казахстану, заявіў ён, заблякавала Расея.
Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт-2020 закладзеныя страты ў памеры 951 млн рублёў.
Расея дагэтуль не кампэнсавала Беларусі страты за пастаўкі бруднай нафты ў красавіку 2019 году — толькі 20 студзеня 2020-га дамовіліся пра падыходы і мэтодыку кампэнсацыі.