У Расеі з 28 сакавіка па 5 красавіка прыпыненая праца рэстаранаў і кавярняў. Выключэньні зробленыя для дыстанцыйнага гандлю. Такое даручэньне прэм’ер-міністар Расеі Міхаіл Мішусьцін даў рэгіянальным органам улады.
Як паведамляе «Настоящее время», гэтае рашэньне было прынята адразу пасьля сустрэчы прэзыдэнта Расеі Ўладзіміра Пуціна з прадстаўнікамі бізнэсу, прысьвечанай падтрымцы эканомікі ва ўмовах эпідэміі каранавірусу. На ёй уладальніца сеткі кавярняў «Андэрсан» Анастасія Татулава назвала сытуацыю ў сфэры грамадзкага харчаваньня трагедыяй і папрасіла зьмяніць для іх рэжым падаткаабкладаньня.
Каранавірус у Беларусі і ў сьвеце. Як разьвіваюцца падзеі >>
Пуцін у адказ заявіў, што такімі выключэньнямі скарыстаюцца нядобрасумленныя людзі, але Татулава стала спрачацца. Яна таксама раскрытыкавала шэраг іншых мер ураду, заклікала не палохаць бізнэс пракуратурай і прапанавала замяніць абяцаньні адтэрміноўкі выплаты падаткаў на падатковыя вакацыі. «Якая розьніца — вакацыі або адтэрміноўка», — адказаў на гэта Пуцін.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
