Некаторыя ўчасткі Вялікай Кітайскай сьцяны паблізу Пэкіна, пачынаючы з суботы, 25 студзеня, будуць зачыненыя для наведнікаў.
Гэты крок, на думку кітайскіх уладаў, можа прадухіліць распаўсюджваньне новага каранавіруса. Ён перадаецца ад чалавека да чалавека і атакуе дыхальныя шляхі.
Паводле апошніх зьвестак, колькасьць загінулых ад новай інфэкцыі дасягнула 26. Яшчэ амаль 900 чалавек заражаныя, у тым ліку і мэдыкі.
Сытуацыя ўскладняецца ў сувязі з надыходзячым кітайскім Новым годам. Традыцыйна ў падчас сьвятаў многія жыхары Кітая ўдзельнічаюць у масавых мерапрыемствах і адпраўляюцца ў адпачынак у іншыя краіны.
Нягледзячы на хуткае распаўсюджваньне віруса, Сусьветная арганізацыя аховы здароўя (СААЗ) адмовілася аб'яўляць надзвычайную сытуацыю.
