Колькасьць насельніцтва Ўкраіны на 1 сьнежня 2019 году склала 37 мільёнаў 289 тысяч чалавек, што на 11 мільёнаў 168 тысяч менш, чым паводле перапісу, які праводзіўся ў 2001 годзе.
Як паведаміў міністар Кабінэту міністраў Украіны Дзьмітро Дубілет сёньня на прэсавай канфэрэнцыі ў Кіеве, такія вынікі атрымалі на падставе вывучэньня інфармацыі мабільных апэратараў, пэнсійных фондаў і электронных рэестраў, якія дзейнічаюць на тэрыторыі Ўкраіны, без уліку Крыму і акупаванай часткі тэрыторыі Данецкай і Луганскай абласьцей.
«37 мільёнаў 289 тысяч чалавек ва Ўкраіне. На жаль, у гэтую колькасьць не ўваходзяць тыя, хто стала пражывае за мяжой і на акупаваных тэрыторыях. Гэта колькасьць людзей, якія фізычна знаходзяцца ва Ўкраіне паводле стану на 1 сьнежня 2019 году», — сказаў Дзьмітро Дубілет.
Насельніцтва сталіцы Ўкраіны Кіева — 3,7 мільёна чалавек.
Паводле міністра, колькасна пераважаюць жанчыны — 20,01 мільёна супраць 17,28 мільёна мужчын.
Дзьмітры Дубілет ня выключыў, што Ўкраіна можа адмовіцца ад правядзеньня традыцыйнага перапісу насельніцтва, бо, як прадэманстравала пробнае апытаньне ў двух раёнах Украіны, людзі не адчыняюць дзьверы перапісчыкам.
«Такі перапіс не дае магчымасьці дакладна ацаніць колькасьць насельніцтва. Дастаткова зрабіць якасныя галіновыя электронныя рэестры, і такі падлік будзе больш эфэктыўным», — перакананы міністар.
