45 сутак арышту агулам за пратэсты ў абароны незалежнасьці Беларусі атрымаў ад беларускіх уладаў палітык Павал Севярынец.
10 студзеня Паўла Севярынца вызвалілі пасьля адбыцьця 15 сутак. Яшчэ 30 сутак арышту за ўдзел у дзьвюх акцыях Павал атрымаў сёньня. Сам «здавацца» на адседку Севярынец не зьбіраецца. Кажа, буду займацца справамі на волі, колькі будзе часу.
«Я паспрабую зрабіць тыя справы, якія трэба зрабіць на волі. Але ясна, што зьбіраюцца выканаць распараджэньне Лукашэнкі, каб не хадзілі па вуліцах, і трэба „вырубіць“, я так разумею, вулічных арганізатараў. Адначасова ідзе „кампанія-2020“ — нэўтралізацыя палітычных супернікаў, — тлумачыць Павал Севярынец у камэнтары Радыё Свабода. — З аднаго боку, Лукашэнка пасылае сыгнал Пуціну, што ён, маўляў, змагаецца з „нацыяналістамі“. З другога, ён, напэўна, хоча стабілізаваць сытуацыю перад прэзыдэнцкімі выбарамі і сур’ёзнымі размовамі з расейцамі. Зачышчае, закручвае гайкі, гэта звычайны пэрыяд рэпрэсій».
На пытаньне, якой будзе стратэгія апазыцыі для абароны незалежнасьці Беларусі на найбліжэйшы час, Севярынец адказвае:
«Буду рабіць усё, што ў маіх сілах. Я лічу, што пры самым малым намёку на тое, што Беларусь можа быць здадзеная, трэба пратэставаць».
Адседка перашкодзіла Севярынцу прысутнічаць на абвешчаным мітынгу за незалежнасьць 29 сьнежня. Напярэдадні лідары апазыцыі зьмянілі плян, абвешчаны Севярынцам, і замест мітынгу а 12 гадзіне абвясьцілі «ланцуг за незалежнасьць» а 15-й. Аднак людзі прыйшлі на абедзьве акцыі. Севярынец дзеяньні сваіх паплечнікаў камэнтаваць адмаўляецца.
«Ня буду казаць багата крытычных словаў. Хто што можа, той тое і робіць, — адказвае Павал. — Дзякуй усім людзям, якія прыйшлі 29-га сьнежня. І тым, хто па рэгіёнах гэта ўсё зрабіў. Я спадзяюся, што ў беларусаў дастаткова тых, хто будзе пратэставаць. І дастаткова тых, хто паспрабуе абудзіць беларускі народ. Галоўная задача — ня проста зрабіць карцінку і вывесьці тысячу ці дзесяць тысяч чалавек. Наша задача — абудзіць беларускі народ, які пакуль што „сьпіць у шапку“. А Беларусь прадаюць».
У сям’і Паўла і Вольгі Севярынцаў гадуецца малы сын Францішак. Агулам Паўлу прысудзілі 2 625 рублёў штрафу за ўдзел у мітынгах. Гэтая сума непад’ёмная для іх сямейнага бюджэту, кажа Павал. «Мая сям’я без дапамогі неабыякавых людзей проста збанкрутавала б, — кажа Павал. — Нават адзін штраф у 50 базавых большы, чым наш сямейны бюджэт. Дзякуй неабыякавым людзям, якія дапамагаюць».
Яшчэ горш для сям’і — доўгая адсутнасьць бацькі. Вользе Севярынец на час адсутнасьці Паўла дапамагаюць бацькі яе і Вольгі, і таксама сябры. Сям’я Севярынцаў вельмі ўдзячная ўсім за гэтую дапамогу.
10 сьнежня Паўла Севярынца судзілі ў трох адміністрацыйных справах за ўдзел у мітынгах супраць інтэграцыі з Расеяй. Акрамя арышту Севярынцу раней прысудзілі штрафы ў 1275 і 1350 рублёў (на другі суд яго не даставілі з арышту). Ён сустрэў за кратамі і дзень народзінаў (30 сьнежня палітыку споўнілася 43 гады), і Новы год, і Раство.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
