Аляксандар Лукашэнка прызначыў новых намесьнікаў міністра і кіраўнікоў у шэраг выканаўчых камітэтаў, паведамляе прэзыдэнцкая прэсавая служба. Бальшыня чыноўнікаў раней ужо займалі пасады ў структуры органаў абласной ці раённай улады.
Ці не найбольш пазнавальны ў гэтым шэрагу былы намесьнік старшыні Палаты прадстаўнікоў Баляслаў Пірштук, які сярод іншага адказваў за збліжэньне пазыцый Беларусі і Эўразьвязу ў пытаньні мараторыю на сьмяротнае пакараньне. Цяпер Пірштук будзе працаваць намесьнікам міністра прыродных рэсурсаў і аховы навакольнага асяродзьдзя.
Акрамя таго, Сяргей Гунько стане першым намесьнікам міністра прамысловасьці, а Натальля Філіпава — намесьніцай міністра юстыцыі. Таксама Анатоль Бубен будзе кіраваць канцэрнам «Белдзяржхарчпрам», Ігар Шустаў прызначаны генэральным дырэктарам ААТ «Менск Крышталь».
Іншыя прызначэньні тычацца найперш рэгіянальнага ўзроўню:
- Так, на вакантную пасаду першага намесьніка старшыні Гомельскага аблвыканкаму ўзгоднены экс-кіраўнік камітэту сельскай гаспадаркі і харчаваньня Ігар Часнок.
- Намесьнік старшыні Лідзкага райвыканкаму Віктар Пранюк стане намесьнікам старшыні Горадзенскага аблвыканкаму.
- Полацкі райвыканкам узначаліць старшыня Верхнядзьвінскага райвыканкаму Ігар Марковіч, чыё крэсла пяройдзе першаму намесьніку Васілю Шылаву.
- Старшынёй Талачынскага райвыканкаму стане Алег Лындзін, які дагэтуль кіраваў Дубровенскім райвыканкамам.
- На пасаду старшыні Нараўлянскага райвыканкаму ўзгоднены Сяргей Дылюк, экс-намесьнік старшыні Мазырскага райвыканкаму.
- Першы намесьнік старшыні Мастоўскага райвыканкаму Генадзь Шатуеў падвышаны да старшыні райвыканкаму ў Карэлічы.
- Намесьнік старшыні Слонімскага райвыканкаму Ўладзіслаў Гершгорын пераведзены кіраваць Ашмянскім райвыканкамам.
- На пасаду старшыні Касьцюковіцкага райвыканкаму ўзгоднены Аляксандар Гарбачэўскі, цяперашні намесьнік старшыні Клімавіцкага райвыканкаму.
- Першы намесьнік старшыні Дрыбінскага райвыканкаму Сяргей Шацкі пойдзе на павышэньне ў Крычаўскі райвыканкам.
