У дарожных мапах, якія Беларусь і Расея абмяркоўваюць у рамках паглыбленьня працэсу інтэграцыі, палітычных пытаньняў няма, заявіў журналістам прэм’ер-міністар Беларусі Сяргей Румас 6 сьнежня ў Менску, перад пачаткам першай сэсіі Палаты прадстаўнікоў сёмага скліканьня, паведамляе БелаПАН.
«У тых дарожных мапах, у тым пакеце дакумэнтаў, які мы абмяркоўваем, палітычных пытаньняў няма, — сказаў ён. — Пытаньні толькі ёсьць эканамічныя. Я ня ведаю, можа, у кагосьці ў галовах ёсьць гэтыя пытаньні [палітычныя. — Рэд.]. Гэта мне невядома. Але ў дакумэнтах, якія мы будзем прапаноўваць кіраўнікам дзяржаваў для падпісаньня, ніякіх наднацыянальных органаў няма».
На пытаньне БелаПАН, калі грамадзкасьць азнаёмяць са зьместам дарожных мапаў паглыбленай інтэграцыі, Румас сказаў: «Як толькі дакумэнты будуць падпісаныя, яны будуць апублікаваныя».
На просьбу пракамэнтаваць заплянаваную апазыцыяй на 7 сьнежня акцыю ў падтрымку незалежнасьці Беларусі прэмʼер-міністар адзначыў: «У нас свабодная краіна. Калі сходы праходзяць у рамках, дазволеных законам, ну...» (паціснуў плячыма).
6 сьнежня ў Сочы адбудзецца сустрэча прэмʼер-міністраў Беларусі і Расеі Сяргея Румаса і Дзмітрыя Мядзьведзева. Чакаецца, што яны абмяркуюць ход узгадненьня дарожных мапаў паглыбленай інтэграцыі. Усьлед за прэмʼерамі, 7 сьнежня, правядуць перамовы ў Сочы Пуцін і Лукашэнка. Гэтую інфармацыю пацьвердзіў напярэдадні прэс-сакратар Пуціна Дзьмітрый Пяскоў.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
