Канстанціна Бурыкіна вызвалілі з калёніі пасьля трох гадоў зьняволеньня. Але дачка абвінаваціла яго ў сэксуальным гвалце, і гэтая справа яшчэ не закрытая.

Гвалтоўныя дзеяньні сэксуальнага характару з 2012 па 2016 год

Канстанціна Бурыкіна, праваслаўнага сьвятара і настаяцеля прыходу ў пасёлку Гатава каля Менску, арыштавалі ў лістападзе 2016 году. Займаўся справай ГУБАЗіК МУС. У СМІ Бурыкіна хутка ахрысьцілі «бацюшкам са свастыкай» — на целе Бурыкіна сапраўды ёсьць татуіроўкі ў выглядзе нацысцкага сымбаля. Прычынай арышту стала незаконнае захоўваньне зброі.

Бурыкін на судзе віну прызнаў, расказаў таксама пра свае сувязі з радыкальнай прарасейскай арганізацыяй РНЕ. Па яго словах, менавіта чальцы РНЕ перадалі яму зброю для захоўваньня. Суд прысудзіў Бурыкіну тры гады зьняволеньня ў калёніі ўзмоцненага рэжыму.

За некалькі месяцаў да вызваленьня, у чэрвені 2019 году, стала вядома яшчэ пра адну крымінальную справу ў дачыненьні да Канстанціна Бурыкіна. Гэтым разам па артыкуле аб сэксуальных дзеяньнях гвалтоўнага характару.

Падрабязнасьці раскрыў намесьнік генэральнага пракурора Аляксей Стук. Ён сказаў, што справу супраць Бурыкіна завялі 6 чэрвеня паводле артыкула 167 Крымінальнага кодэксу «Гвалтоўныя дзеяньні сэксуальнага характару», а пацярпелай была дачка асуджанага.

«Падзеі былі з 2012 па 2016 год, а дачка 1999 году нараджэньня. Цяпер дае паказаньні. Яна баялася: ён дэспатычны чалавек. Я думаю, сьледзтва разьбярэцца».

Пасьля гэтага Аляксандра Бурыкіна, якая адразу пасьля арышту бацькі выступала ў яго абарону, дала шэраг інтэрвію, у якіх расказала пра гвалт. Некалькі месяцаў пра лёс Бурыкіна, які мог выйсьці на волю яшчэ летам па амністыі, нічога не было вядома. А 18 лістапада сьвятара выпусьцілі з-пад варты.

«Бацюшка як бацюшка»

Царква ў пасёлку Гатава пад Менскам зачыненая. На браме вялізны замок, за агароджай нікога не відаць. У чэрвені, адразу пасьля прызнаньняў Аляксандры Бурыкінай, было іначай. У царкоўным шапіку можна было пагаварыць з жанчынамі, якія прыслужваюць ля храма. Тут жа быў ахоўнік.

«А ня ведаю, чаму зачынена, — кажа сталая прыхаджанка, якую сустракаем каля царкоўнай брамы. — Павінна быць з 10 гадзіны ўжо адчынена, заўсёды раніцай яны адчыняюць. Службы няма сёньня, службы ў выходныя і ў сьвяты, часам у пятніцу ці чацьвер. Але адчынена заўсёды».

Пра вызваленьне Канстанціна Бурыкіна, які спрычыніўся да будаўніцтва царквы ў Гатаве, жанчына ня чула. Ведае толькі, што ён быў асуджаны «за зброю» і што «пісалі ў інтэрнэце пра яго і дачку».

«Цяпер тут у нас іншыя сьвятары, — кажа прыхаджанка. — А яго я памятаю. Але нічога дрэннага не скажу, бацюшка як бацюшка. Службы звычайныя былі. Нічога такога не скажу».

У размове са Свабодай у канцы чэрвеня супрацоўнікі царквы таксама расказвалі, што нічога дрэннага пра Бурыкіна ня памятаюць. На ўваходзе ў храм тады стаяла скарбонка для збору грошай на дапамогу сям’і айца Канстанціна.

Крыху больш удаецца даведацца на невялічкім мясцовым рынку. Жанчыны, якія там гандлююць хатнімі закаткамі і кітайскай драбязой, прызнаюцца, што ўжо чулі пра вызваленьне колішняга мясцовага сьвятара.

«Чулі, чулі мы пра гэта, — кажа адна з гандлярак. — Учора яго вызвалілі і далі 24 гадзіны на зборы. Яму сказалі ехаць у Расею, там у яго бацька яшчэ жывы. (Канстанцін Бурыкін — дагэтуль грамадзянін Расеі, хоць і прыехаў у Беларусь з Омску яшчэ ў 90-я. — РС.) Так што ў нас больш служыць ён ня будзе ўжо».

«Крымінальная справа ня спыненая»

У Сьледчым камітэце Свабодзе сказалі, што, нягледзячы на вызваленьне, крымінальная справа ў дачыненьні да Канстанціна Бурыкіна ня спыненая. Афіцыйнай інфармацыі пра магчымую дэпартацыю сьвятара ў Расею пакуль няма.

«Расьсьледаваньне гэтай крымінальнай справы ня спыненае, — сказаў Свабодзе прадстаўнік СК Сяргей Кабаковіч. — Гэта ўсё, што я пакуль магу паведаміць».

Свабода зьвярнулася па камэнтар да афіцыйнага прадстаўніка праваслаўнай царквы ў Беларусі Сяргея Лепіна.

«У нас няма ніякай афіцыйнай інфармацыі пра лёс Канстанціна Бурыкіна, — сказаў Свабодзе Лепін. — Менскае епархіяльнае ўпраўленьне яшчэ не атрымлівала ніякіх паведамленьняў на гэты конт. Трэба чакаць, афіцыйна нічога не вядома. Аднак я думаю, што Канстанцін Бурыкін наўрад ці вернецца ў якасьці сьвятара на сваё папярэдняе месца службы. Гэта маё асабістае меркаваньне».

Дзе цяпер Канстанцін Бурыкін, невядома. Яго жонка Вольга, якая ў чэрвені ў размове са Свабодай настойвала на невінаватасьці мужа, цяпер адмаўляецца кантактаваць з журналістамі. Сваёй маці, зь якой разам жыве ў Менску ў кватэры Бурыкіна, яна таксама забараніла расказваць, дзе яна.

«Я нічога вам не скажу больш, — сказала Вользіна маці ў тэлефоннай размове. — Ні дзе Вольга знаходзіцца, ні дзе Канстанцін. Да пабачэньня».

Атрымаць камэнтар у Аляксандры Бурыкінай цяпер немагчыма. У размове з журналістамі «Нашай Нівы», адразу пасьля навіны пра вызваленьне Канстанціна Бурыкіна, дзяўчына выказала апасеньні за свой далейшы лёс. Брат Аляксандры, Аляксей Ягораў, сказаў Свабодзе, што таксама ня можа зьвязацца зь сястрой.