Улады зацьвердзілі горадабудаўнічы праект дэталёвага плянаваньня тэрыторыі на месцы тралейбуснага дэпо і заводу «Гарызонт» у Менску. Паводле яго, да 2025 году на месцы тралейбуснага дэпо павінен зьявіцца жылы квартал. Адпаведны дакумэнт апублікаваны на Нацыянальным прававым інтэрнэт-партале.
Тэрыторыю пад забудову прадалі «А100» яшчэ ў 2017 годзе. А пляны на забудову ўчастка агучваліся яшчэ з 2003 году, калі тэндэр выйграла маскоўская кампанія: абяцалі элітнае жытло, 5-зоркавы гатэль і бізнэс-цэнтар на паўмільярда даляраў, але не пачалі нават расчышчаць тэрыторыю пад забудову.
Новы праект у межах вуліц Кісялёва — Куйбышава — праспэкт Машэрава — праспэкт Незалежнасьці прэзэнтавалі ўвесну, цяпер яго зацьвердзілі менскія ўлады.
Паводле цяперашняга праекту, рэканструяваць тэрыторыю будуць у два этапы:
1 этап (да 2025 году):
- знос будынкаў і збудаваньняў тралейбуснага дэпо;
- распрацоўка захадаў для абароны ад транспартнага шуму жылой забудовы, якая разьмесьціцца на тэрыторыі;
- праектаваньне і будаўніцтва жылога комплексу з убудаванымі\прыбудаванымі аб’ектамі грамадзкага прызначэньня і аўтастаянкамі (пераважна падземнымі) і дзіцячага садка;
- праектаваньне і рэканструкцыя сярэдняй школы № 21 па вуліцы Куйбышава, 19 з давядзеньнем парамэтраў па ўмяшчальнасьці да праектных (будаўнічых).
2 этап (да 2030 году):
- знос будынкаў і збудаваньняў былога заводу «Гарызонт» усярэдзіне кварталу Машэрава — Чырвоная — Куйбышава — Кісялёва;
- рэканструкцыя карпусоў былога заводу «Гарызонт» на вуліцы Куйбышава і на праспэкце Машэрава;
- будаўніцтва гандлёва-забаўляльнага цэнтру з падземным паркінгам;
- рэканструкцыя адміністрацыйных будынкаў (банкаў).
Участак набыла з аўкцыёну ў 2017 годзе за 8,8 млн даляраў кампанія «А-100 Дэвэлапмэнт», якая таксама ўзводзіла жылыя кварталы «Зялёны Бор» і «Новая Баравая», сетку АЗС «А100», аўтасалёны і іншае. Зносіць усе будынкі дэпо і дэмантаваць інжынэрныя сеткі кампанія-забудоўнік будзе за свой кошт.
