Старшыня Цэнтральнай выбарчай камісіі Беларусі Лідзія Ярмошына ня ведае дакладных датаў прэзыдэнцкіх і парлямэнцкіх выбараў.
Яна адзначыла, што гэта вызначае кіраўнік дзяржавы. Па яе прагнозах, адна з кампаній (зь вялікай імавернасьцю, выбары ў Палату прадстаўнікоў) дакладна пройдзе сёлета ў лістападзе. Але канкрэтнай даты дагэтуль няма.
Паводле яе, калі гэта адбудзецца 7 лістапада, як прапаноўваў Аляксандар Лукашэнка, то прэзыдэнцкія ў такім выпадку будуць прызначаныя на канец ліпеня наступнага году. А калі 17-га, як хацела б кіраўніца ЦВК, то гэты тэрмін адсунецца на пачатак жніўня 2020-га.
На пытаньне, ці не замала прэтэндэнтаў удзельнічае як у прэзыдэнцкіх, так і ў парлямэнцкіх выбарах, Лідзія Ярмошына адказала, што так.
«Мінуў час, калі шчыра верылася, што кожная „кухарка“ здольная кіраваць дзяржавай. І калі ва ўладу імкнецца хто заўгодна, гэта азначае, што краіна на слабой ступені разьвіццья. Таму невялікая колькасьць прэтэндэнтаў — хутчэй ня мінус, а плюс», — падсумавала яна.
Лідзія Ярмошына сказала, што ў сярэдзіне чэрвеня зьбіраецца ў адпачынак і спадзяецца да таго часу сустрэцца з Аляксандрам Лукашэнкам. Магчыма, пасьля аўдыенцыі і стануць вядомыя дакладныя даты выбараў.
