У паведамленьні парталу гаворыцца:
«Матэрыял па выніках першага паўфіналу быў апублікаваны на нашым партале 15 мая ў 13.25. У ім мы пацікавіліся ў прадстаўнікоў журы, як яны ацэньваюць выступленьне Зены і якое ўражаньне ў іх склалася пра іншых удзельнікаў паўфіналу.
Бліжэй да вечару патэлефанавалі прадстаўнікі Белтэлерадыёкампаніі і паведамілі, што атрымалі прэтэнзіі ад арганізатараў конкурсу з нагоды гэтага інтэрвію. З сайту матэрыял адразу ж быў выдалены.
Tut.by прыносіць свае шчырыя прабачэньні ўсім прыхільнікам гэтага шоў. На жаль, мы не валодалі поўнай інфармацыяй, якая тычыцца правілаў гэтага конкурсу. У адваротным выпадку такі матэрыял ніколі б не зьявіўся ў нас на партале.
Але, як паказала сытуацыя, ува ўсе дэталі не былі пасьвечаныя і прадстаўнікі беларускага журы».
Беларускае журы на сьпеўным конкурсе «Эўравізія» было дыскваліфікаванае перад фіналам. Прычынай паслужыла тое, што беларускае журы агучыла, за каго галасавала ў паўфінале, а гэта забаронена правіламі «Эўравізіі».
Пасьля паўфіналу ў аўторак старшыня беларускага журы Валерый Прыгун сказаў Tut.by: «Мы вызначылі трох пераможцаў практычна аднагалосна. Увогуле, у першых шасьці або сямі месцах у нас амаль не было спрэчак. Яны пачаліся на 8-10-х месцах».
Акрамя таго, іншыя чальцы журы распавялі, якія краіны ім спадабаліся падчас паўфіналу.
Беларусь на конкурсе ў Ізраілі прадстаўляе 16-гадовая Zena (Зінаіда Купрыяновіч), якая, паводле вэрсіі Eurovisionworld, уваходзіла ў дзясятку фаварытаў.
Zena выступіць у фінале конкурсу сёньня, 18 траўня. Яна выступіла ў першым паўфінале пад нумарам 8 з кампазыцыяй на ангельскай мове Like It.
Усяго сёлета на Эўравізіі спаборнічае 41 канкурсант. Турэччына, Босьнія і Герцагавіна, Славаччына, Баўгарыя, Украіна вырашылі ў гэтым годзе ня ўдзельнічаць.
Зінаіда Купрыяновіч — самая юная ўдзельніца Эўрабачання сёлета. Музыкай яна займаецца з 11 гадоў і ўжо ў 15-гадовым узросьце падпісала прафэсійны кантракт з расейскім прадусарам Віктарам Дробышам.
Зена была пераможцай прэміі дзіцячага конкурсу «Славянскі базар у Віцебску 2014», фіналісткай нацыянальнага адбору конкурсаў песьні «Дзіцячая Эўравізія» ў 2015 і 2016 гадах.
Штогадовы песенны конкурс Эўравізія сёлета праходзіць у ізраільскім Тэль-Авіве ў выставачным цэнтры «Ізраільскі цэнтар кірмашоў». Летась сьпявачка Нэта Барзілай прынесла Ізраілю перамогу.
