Адбылася тэлефонная размова Аляксандра Лукашэнкі з прэзыдэнтам Казахстана Нурсултанам Назарбаевым, які прыняў рашэньне сысьці ў адстаўку.
Кіраўнік Беларусі адзначыў, што зь вялікім шкадаваньнем успрыняў гэты крок свайго сябра, паведамляе Белта.
«Размова ў цэлым атрымалася вельмі цёплай. Аляксандр Лукашэнка і Нурсултан Назарбаеў дамовіліся абавязкова сустрэцца падчас юбілейнага саміту Эўразійскага эканамічнага саюза, які пройдзе ў Астане ў траўні бягучага года», - гаворыцца ў паведамленьні прэс-службы Лукашэнкі.
У тэлефоннай размове Лукашэнка падкрэсьліў, што статус «Лідэра нацыі» Нурсултан Назарбаеў, як першы прэзыдэнт краіны, мае заслужана, паколькі сучасны Казахстан створаны і пабудаваны намаганьнямі Нурсултана Назарбаева.
