Толькі 9 студзеня ў пункты абагрэву ў Гомельскай і Віцебскай абласьцях зьвярнуўся 691 чалавек, паведаміў Свабодзе спэцыяліст Чырвонага Крыжа з аддзелу па рэагаваньні на надзвычайныя сытуацыі і вышуку Васіль Скубілаў.
Чаму толькі ў дзьвюх абласьцях?
Чырвоны Крыж адкрывае мабільныя пункты абагрэву пры тэмпэратуры −15°C і ніжэй. Там раздаюць цёплую ежу, напоі, бяздомным даюць цёплае адзеньне. Увечары 9 сьнежня быў арганізаваны пункт абагрэву каля Дому начнога знаходжаньня бяздомных людзей у Менску (вул. Ваўпшасава, 42).
9 сьнежня дапамогу атрымалі:
- 524 чалавек у мабільных пунктах абагрэву Гомля і Гомельскай вобласьці;
- 150 чалавек у Віцебску і Віцебскай вобласьці;
- 17 чалавек атрымалі цёплае адзеньне, прадуктовыя і гігіенічныя наборы.
Куды можна прынесьці адзеньне для бяздомных?
Кантэйнэры, куды можна прынесьці чыстае адзеньне, Чырвоны Крыж усталяваў у Берасьці і на Берасьцейшчыне, у Гомлі і на Гомельшчыне, а таксама ў Менску. Адрасы кантэйнэраў пералічаныя тут. Адзеньне можна прыносіць і ў рэгіянальныя аддзяленьні Чырвонага Крыжа.
Найбольш запатрабаванае ў зімовы час цёплае адзеньне: курткі, швэдры, шапкі, пальчаткі, шалікі, а таксама спартовае адзеньне, футболкі і штаны.
Таксама можна здаць:
- абутак;
- сумкі і заплечнікі;
- коўдры;
- цацкі.
Рэчы для ахвяраваньня павінны быць:
- чыстыя;
- без пашкоджаньняў і забруджваньняў;
- прыдатныя для нашэньня;
- складзеныя ў пакет.
