Моладзевае крыло Партыі БНФ «Моладзь БНФ» і ініцыятыва «Задзіночаньне беларускіх студэнтаў» пачынаюць кампанію «Свабодны выбар», якая скіраваная супраць манаполіі БРСМ у сфэры моладзевай палітыкі.
Кампанія, паведамляе БелаПАН, зьвязана са зьяўленьнем у мэдыя вялікай колькасьці нэгатыўных навінаў пра БРСМ, у прыватнасьці пра тое, што студэнтаў ня толькі прымушаюць уступаць у саюз і плаціць унёскі, але і неафіцыйна забараняюць выхад зь яго пад пагрозай адлічэньня з ВНУ.
Сярод праблем, якія пацьвярджаюць манаполію БРСМ, арганізатары кампаніі «Свабодны выбар» называюць: дзяржаўныя датацыі на карысьць саюзу; непразрыстасьць яго дзейнасьці (цэнтралізаванае кіраваньне, адсутнасьць фінансавай справаздачнасьці ў адкрытым доступе); факты прымусовага ўступленьня; манапалізацыю ўнівэрсытэцкіх органаў самакіраваньня і моладзевых парлямэнтаў.
«Гэтыя і многія іншыя факты паказваюць, што БРСМ сёньня зьяўляецца не арганізацыяй, якая прадстаўляе і абараняе інтарэсы моладзі, а звычайным рупарам дзяржаўнай прапаганды зь велізарным адміністрацыйным рэсурсам, які існуе на бюджэтныя грошы», — лічаць ініцыятары кампаніі.
На думку моладзевых арганізацый, цяперашні БРСМ павінен быць пазбаўлены манаполіі ў моладзевай сфэры. Замест гэтага неабходна правесьці глябальную рэформу моладзевай палітыкі, накіраваную на разьвіцьцё моладзевай няўрадавых арганізацый.
Неадʼемнай часткай моладзевай палітыкі ініцыятары кампаніі называюць моладзевы парлямэнтарызм і студэнцкае самакіраваньне.
«Цяпер большасьць гэтых структур штучна створаныя і працуюць чыста дэкаратыўна: у моладзевых парлямэнтах няма дыялёгу, а цяперашнія органы студэнцкага самакіраваньня не зьяўляюцца рэпрэзэнтатыўнымі і не адпавядаюць нормам Балёнскага працэсу», — гаворыцца ў паведамленьні.
