Грамадзяніна Беларусі Івана Марчука ва Ўкраіне падазраюць у падпальваньні прадпрыемстваў і гандлі зброяй у складзе групы.
Праваахоўныя службы Ўкраіны на пачатку лістапада затрымалі 8 асобаў, якія падазраюцца ў 8 рэзанансных злачынствах з выкарыстаньнем супрацьтанкавай зброі і незаконным продажам боепрыпасаў і выбухоўкі.
Сярод затрыманых — грамадзянін Беларусі, ураджэнец Берасьця Іван Марчук. Як паведаміў Свабодзе адвакат, якога прызначылі Марчуку, той сьцьвярджаў, што раней служыў у францускім Іншаземным легіёне. Вядома таксама, што Іван Марчук жанаты і раней не прыцягваўся да крымінальнай адказнасьці.
Абаронца адмовіўся ацэньваць доказы, сабраныя сьледзтвам, адзначыўшы, што на той момант матэрыялы справы былі закрытыя. Цяпер працягваецца дасудовае сьледзтва, а ў справе ўжо іншы адвакат, які атрымае доступ да матэрыялаў пасьля завяршэньня расьсьледаваньня.
У хадайніцтве, зь якім сьледчы зьвярнуўся ў суд для арышту беларуса, адзначалася, што ён падазраецца «ў арганiзацыi ўзброенай банды з мэтай нападу на прадпрыемствы, установы, арганізацыі і на некаторых асобаў», а таксама ва «ўдзеле ў такой бандзе і ўчыненьні наўмыснага зьнішчэньня і пашкоджаньня чужой маёмасьці шляхам падпалу і выбуху».
Івану Марчуку пагражае да 15 гадоў зьняволеньня.
Адзін з эпізодаў, які інкрымінуюць беларусу, — удзел у нападзе з гранатамётам на будынак, дзе месьціцца рэдакцыя інтэрнэт-выданьня «Українська правда» (будынак належыць будаўнічай кампаніі «Київміськбуд»).
Паводле Службы бясьпекі Ўкраіны, лідэрам злачыннай групоўкі быў грамадзянін Расеі. У часе дасудовага расьсьледаваньня ўстаноўленыя факты продажу 13 гранатамётаў, якія былі незаконна перамешчаныя з тэрыторыі правядзеньня апэрацыі Аб’яднаных сілаў на Данбасе.
