26–27 кастрычніка ў Менску зь візытам знаходзіцца француская дэлегацыя на чале зь дзяржаўным сакратаром пры Міністэрстве Эўропы і замежных спраў Францыі Жан-Батыстам Лемуанам, пасада якога адпавядае рангу намесьніка міністра.
Францускія чыноўнікі такога ўзроўню апошні раз наведвалі Менск у 2011 годзе. Спадар Лемуан 26 кастрычніка адкрые пяты француска-беларускі бізнэс-форум і паўдзельнічае ў трэцім пасяджэньні сумеснай Беларуска-французскай камісіі эканамічнага супрацоўніцтва. Беларускую дэлегацыю на гэтых перамовах узначаліць намесьнік міністра замежных спраў Алег Краўчанка.
У плянах спадара Лемуана сустрэча з намесьніка прэм’ер-міністра Беларусі Ігарам Петрушэнкам, іншымі прадстаўнікамі ўладаў. Дзяржаўнага сакратара суправаджае дэлегацыя прадпрыемстваў, якія актыўна працуюць на беларускім рынку.
Але перш за ўсё францускі дыплямат правёў сустрэчу зь лідэрамі беларускай апазыцыі і грамадзянскай супольнасьці, на якой прысутнічалі сярод іншых старшыня БНФ Рыгор Кастусёў, дэпутатка Палаты прадстаўнікоў ад АГП Ганна Канапацкая, старшыня праваабарончага цэнтру «Вясна» Алесь Бяляцкі і кіраўнік БХК Алег Гулак, лідэр руху «Гавары праўду» Тацяна Караткевіч.
Спадар Лемуан заявіў прадстаўнікам беларускай грамадзкай супольнасьці, што, хоць ягоны візыт прысьвечаны эканамічнаму супрацоўніцтву Беларусі і Францыі, але ён будзе гаварыць зь беларускімі ўладамі і аб праблемах правоў чалавека, свабоды слова, сходаў і асацыяцый, сьмяротнага пакараньня. Францыя дамагаецца, каб беларускія ўлады выконвалі асноўныя свабоды і правы чалавека, каб быў уведзены мараторый на сьмяротнае пакараньне.
Беларускія суразмоўцы расказалі спадару Лемуану пра настроі беларускай моладзі, уплыў на Беларусь расейскай прапаганды і так званай «мяккай сілы», пра чарговых асуджаных у Беларусі на сьмяротнае пакараньне і пакараных, аб пратэстах людзей у Сьветлагорску і Берасьці і палітвязьнях.
Паводле інфармацыі амбасады Францыі ў Менску, таваразварот паміж Францыяй і Беларусьсю вырас на 50% за апошнія гады, аднак яго ўзровень застаецца ніжэйшым за магчымы патэнцыял.
Дзяржаўны сакратар Лемуан зьбіраецца зьвярнуць увагу беларускіх уладаў на заклапочанасьць францускіх прадпрыемстваў што да іх выхаду на рынак і расказаць пра наступствы зьмякчэньня правілаў прадастаўленьня крэдытнага страхаваньня Францускім дзяржаўным інвэстыцыйным банкам BPI France для Беларусі.
Чакаецца падпісаньне пагадненьня паміж урадам Рэспублікі Беларусь і ўрадам Францускай Рэспублікі аб міжнародных аўтамабільных перавозках пасажыраў і грузаў.
