Украінскі рэжысэр Алег Сянцоў, які знаходзіцца ў расейскай турме, стаў ляўрэатам прэміі Сахарава. Пра гэта паведамляе карэспандэнт Радыё Свабода ў Брусэлі са спасылкай на крыніцу.
Цырымонія ўручэньня прэміі пройдзе ў Страсбургу 12 сьнежня.
Прэмію «За свабоду думкі» імя Андрэя Сахарава ўручае Эўрапарлямэнт. У 2006 годзе гэтай прэміяй быў уганараваны былы кандыдат у прэзыдэнты Беларусі Аляксандар Мілінкевіч.
У жніўні 2015 году Алег Сянцоў быў асуджаны расейскім судом на 20 гадоў пазбаўленьня волі паводле абвінавачваньня ў падрыхтоўцы тэрактаў у Крыме. Ён адмаўляе абвінавачаньні. Ад 14 траўня сёлета ён трымаў галадоўку з патрабаваньнем вызваліць усіх украінскіх палітычных вязьняў у Расеі. Галадоўка была спынена 6 кастрычніка і працягвалася 145 дзён.
Паводле розных крыніц, з палітычных матываў у Расеі асуджана ад 70 да 75 украінцаў.
