Вырашыць праблемы Шатляндыі, зьвязаныя з выхадам Вялікабрытаніі з Эўрапейскага зьвязу, можа незалежнасьць. Пра гэта заявіла першая міністарка Шатляндыі Нікала Стэрджэн, выступаючы на зьезьдзе сваёй партыі.
«Наша рашэньне застацца ў Эўрапейскім зьвязе праігнаравана. Кампрамісны плян шатляндзкага ўраду для захаваньня адзінага рынку адкінуты. Просьба аб удзеле ў перамовах (наконт Brexit — рэд.) адхіленая. Гэта — не партнэрства, гэта — кантроль Вэстмінстэру», — падкрэсьліла Стэрджэн.
Яна дадала, што Лёндан можа супрацьстаяць незалежнасьці Шатляндыі, але ня можа адмаўляць права рэгіёну на выбар.
«Адзінае рашэньне — стаць незалежнай краінай», — адзначыла міністарка.
Папярэдняе галасаваньне аб незалежнасьці ў Шатляндыі адбылося ў верасьні 2014 году. Тады каля 55% шатляндцаў аддалі перавагу ідэі застацца ў складзе Злучанага Каралеўства.
У 2016 годзе большасьць шатляндцаў прагаласавалі за тое, каб застацца ў ЭЗ.
Афіцыйны дзень выхаду Вялікабрытаніі з складу Эўразьвязу — 29 сакавіка 2019, пасьля гэтага пачнецца так званы «пераходны пэрыяд», які будзе доўжыцца да 2021 году.
