Выбарчая камісія Прыморскага краю Расеі адмяніла вынікі выбараў другога туру губэрнатара рэгіёну. Пра гэта паведамляе «Интерфакс».
За гэтае рашэньне прагаласавалі 12 з 13 чальцоў краёвай выбарчай камісіі, адзін выказаўся супраць.
Адмяніць вынікі выбараў у Прымор’і ў сераду рэкамэндавала Цэнтральная выбарчая камісія Расеі. Пазьней кіраўнік ведамства Эла Памфілава падкрэсьліла, што ў ЦВК шакаваныя шматлікімі парушэньнямі. Яна паабяцала расьсьледаваньне «без аглядкі на асобы арганізатараў фальсыфікацый».
Другі тур выбараў губэрнатара Прыморскага краю адбыўся 16 верасьня. На працягу амаль усяго пэрыяду падліку галасоў з адрывам 5-6 % перамагаў кандыдат ад КПРФ Андрэй Ішчанка. Аднак раніцай у панядзелак высьветлілася, што, паводле папярэдніх вынікаў, перамог кандыдат ад «Адзінай Расеі» Андрэй Тарасенка.
Ішчанка заявіў, што на карысьць яго саперніка было «ўкінута» да 40 тысяч галасоў. З 17 верасьня ва Ўладзівастоку праходзяць стыхійныя акцыі супраць фальсыфікацый на выбарах губэрнатара Прымор’я.
