Увядзеньне забаронаў і абмежаваньняў у пытаньні паставак расейскіх нафтапрадуктаў у Беларусь парушыць асноўныя прынцыпы дамовы аб стварэньні Эўразійскага эканамічнага саюзу.
Такое меркаваньне выказаў старшыня канцэрна «Белнафтахім» Андрэй Рыбакоў у інтэрвію БелТА.
«Сёньня ў шэрагу расейскіх СМІ прагучала інфармацыя з камэнтаром міністра энэргетыкі РФ Аляксандра Новака пра тое, што эканамічнай мэтазгоднасьці ў тым, каб пастаўляць расейскія нафтапрадукты ў РБ няма, таму што яны проста могуць рээкспартавацца. Такія заявы, лічым, маюць на мэце паўплываць на хаду перамоўнага працэсу і пазбаўленыя канструктыўнасьці,» — адзначыў Андрэй Рыбакоў.
Ён падкрэсьліў, што сваю пазыцыю і аргумэнты перамоўнікі зь беларускага боку агучваюць на кансультацыях і ня маюць намеру трансьляваць іх у СМІ да завяршэньня перамоўнага працэсу і падпісаньня адпаведных дакумэнтаў.
Паводле Рыбакова цяпер беларускі і расейскі бакі знаходзяцца «на стадыі збліжэньня пазыцыяў».
«Адсутнасьць сыравіны зьнізіць загрузку асобных прадпрыемстваў, што нэгатыўна адабʼецца на канкурэнтаздольнасьці беларускай нафтахімічнай прадукцыі» — заявіў старшыня «Белнафтахіму».
Як паведамлялася, міністар энэргетыкі РФ Аляксандар Новак заявіў сёньня ТАСС, што «эканамічнай мэтазгоднасьці ў тым, каб пастаўляць расейскія нафтапрадукты Беларусі, няма».
А прадстаўнік міністэрства фінансаў Расеі Аляксей Сазанаў паведаміў Reuters, што пастаўкі нафтапрадуктаў з РФ у Беларусь могуць зьменшыцца больш чым у 10 разоў і з 2019 году будуць складаць 100-300 тысяч тон у год, а не каля 2 мільёнаў тон.
