Акторка і рэжысэрка Азія Арджэнта, якая адной зь першых заявіла аб сэксуальных дамаганьнях з боку галівудзкага прадусара Гарві Вайнштэйна, выплаціла актору Джымі Бэнэту $380 тыс. за маўчаньне наконт дамаганьняў зь яе боку, паведамляе The New York Times са спасылкай на свае крыніцы і судовыя дакумэнты.
У 2004 годзе Бэнэт зьняўся ў стужцы Арджэнта «Цыпачкі», там жа яна згуляла ролю маці героя Бэнэта. Паводле актора, у 2013 годзе, калі яму было 17 гадоў, 37-гадовая актрыса сэксуальна дамагалася яго ў Каліфорніі, дзе ўзрост згоды — 18 гадоў. У распараджэньні газэты апынуліся копіі заявы з абвінавачваньнямі, папера аб дамоўленасьці паміж бакамі і фатаграфіі з пакою ў гатэлі падчас меркаванага інцыдэнту.
Як распавялі суразмоўцы выданьня, Бэнэт запатрабаваў кампэнсацыю ад Арджэнта празь месяц пасьля публікацыі артыкулу аб дамаганьнях з боку Вайнштэйна. Адвакаты актора распавялі аб псыхалягічнай траўме, якую нанесьлі дзеяньні рэжысэра. Па вынікам перамоваў Арджэнта заплаціла Бэнэту 380 тысячаў даляраў і заключыла зьдзелку аб маўчаньні.
На запыты журналістаў аб камэнтары ані Арджэнта, ні яе прадстаўнікі не адказалі.
У канцы 2017 года Азія Арджэнта (дачка легендарнага італьянскага рэжысёра фільмаў жахаў Дарыё Арджэнта) распавяла, што ў 1997 годзе Вайнштейн запрасіў яе на вечарынку ў гатэль. Прыехаўшы туды, яна ўбачыла, што ў нумары, акрамя яго, нікога няма. Па словах актрысы, яна доўгія гады вінаваціла сябе за тое, што не знайшла ў сабе сілаў адбівацца, калі прадусар пачаў рабіць ёй кунілінгус. На той момант Арджэнта быў 21 год.
Пасьля акторка стала адной з актывістак руху #MeToo, зь якога пачалася маштабная кампанія супраць дамаганьняў. З прамовай супраць дамаганьняў Арджэнта выступала таксама на Канскім кінафестывалі ў Францыі. Усяго пра дамаганьні з боку Гарві Вайнштэйна распавяла 71 жанчына.
