Кампанія «БелРэстІнвэст» не зьвярталася да Міністэрства культуры з прапановай прафінансаваць мэмарыял у Курапатах. Гэта вынікае з адказу міністэрства на зварот парталу Tut.by.
Аб чым ідзе гаворка?
Падчас сустрэчы з журналістамі 20 ліпеня саўладальнік рэстарацыі «Поедем поедим» у Курапатах, сказаў, што ў 2012 годзе кампанія «БелРэстІнвэст» дасылала ў Мінкульт ліст з прапановай прафінансаваць стварэньне мэмарыялу ва ўрочышчы.
Чаму Мінкульт абвяргае словы Зайдэса?
У Мінкульце сьцьвярджаюць, што ў 2012 годзе звароту ад «БелРэстІнвэст» не атрымлівалі. Цягам 2012–2018 гадоў не атрымлівалі і скаргаў, што на дасланы, паводле Зайдэса, зварот няма адказу.
«Усе ўваходныя дакумэнты ў абавязковым парадку рэгіструюцца ў аддзеле арганізацыйнай працы і дакумэнтазвароту Міністэрства культуры», — напісана ў адказе на зварот.
Паводле вынікаў праверкі, у сыстэме аўтаматызацыі справаводзтва Мінкульту не зарэгістраваны зварот № 110 «БелРэстІнвэст» ад 13 лістапада 2012 году.
7 адказаў на наіўныя пытаньні пра рэстаран ля Курапатаў і пратэсты супраць яго
Што важна ведаць аб пратэстах супраць новай рэстарацыі ў Курапатах
- Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
- 1 чэрвеня рэстаран «Поедем поедим» пачаў рэклямавацца ў інтэрнэце.
- Рэстаран «Поедем поедим» у Курапатах меркавана запрацаваў увечары 5 чэрвеня.
- 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
- Старшыня Партыі БНФ Рыгор Кастусёў 13 ліпеня паведаміў пра нейкія дамоўленасьці з уладальнікам рэстарацыі, але якія гэта дамоўленасьці — пакуль не сказаў.
- Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.
Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
