Міжнародны суд пацьвердзіў атрыманьне пазову Ірану супраць уладаў ЗША ў сувязі з паўторным увядзеньнем Вашынгтонам санкцыяў. Тэгеран лічыць гэтыя дзеяньні адміністрацыі Дональда Трампа парушэньнем угоды па іранскай ядзернай праграме, складзенай Іранам з ЗША і пяцьцю іншымі сусьветнымі дзяржавамі.
Пра падачу пазову днём раней, 16 ліпеня, у Twitter напісаў міністар замежных справаў Ірану Махамад Джавад Зарыф. «Перад пагардай да дыпляматыі і юрыдычных абавязкаў, якую выказваюць ЗША, Іран захоўвае прыхільнасьць вяршэнству закону», — заявіў міністар.
Што адбылося
- ЗША, Брытанія, Францыя, Нямеччына, Расея, Кітай і ЭЗ падпісалі дамову аб зьняцьці міжнародных санкцыяў з Тэгерану ў 2015 годзе.
- У адказ Іран пагадзіўся скараціць сваю праграму па ўзбагачэньні ўрану і ўзяў абавязацельства ня распрацоўваць ядзерную зброю.
- Угода дазволіла Ірану прадаваць на сусьветных рынках сваю нафту і газ.
- Другасныя санкцыі з боку ЗША засталіся ў сіле.
- У траўні адміністрацыя Трампа ў аднабаковым парадку выйшла з пагадненьня.
Падчас саміту NATO на мінулым тыдні ў Брусэлі Трамп заявіў, што з узмацненьнем санкцыяў ён чакае званка з Ірану:
«У нейкі момант яны мне патэлефануюць і захочуць дамовіцца. І мы дамовімся».
Прадстаўнік іранскага МЗС Бахрам Газэмі, у сваю чаргу, 17 лiпеня заявіў, што калі Трамп хоча перамоваў пасьля выхаду зь міжнароднай дамовы, «яму давядзецца праявіць ініцыятыву самому», паколькі кіраўніцтва Ірану адмаўляецца ад любых перамоваў з ЗША.
