У кватэры 28-гадовага Рамана Кузьмянкова правялі ператрус, забралі аргтэхніку і дапыталі ў сьледчым камітэце, навошта ён піша звароты ў райвыканкам, крытыкуючы мясцовыя ўлады.
Жыхара Воршы выклікалі ў сьледчы камітэт на падставе «ананімкі»
Раман Кузьмянкоў рапавёў Свабодзе, што ўвечары 15 траўня двое міліцыянтаў забралі ў яго кампутар, непрацоўную друкарку, флэшку і зьменны дыск.
«Міліцыянты паказалі пастанову на агляд кватэры, дзе падстава для ператрусу — нібыта я абразіў кагосьці з аршанскіх чыноўнікаў. Супрацоўнікі назвалі сябе, паклікалі панятых — маіх суседзяў. Але не пакінулі аніякіх папераў, што забралі аргтэхніку. Я нават не запомніў прозьвішчы, бо спадзяваўся атрымаць на рукі дакумэнт, дзе яны будуць запісаны. Ці копію. Але мне нічога не далі. Я пра гэта распавёў сёньня ў сьледчым камітэце, куды мяне выклікалі на размову,» — апавёў Раман.
Паводле Кузьмянкова, у сьледчым камітэце яму сказалі, што праводзяць праверку па ананімным звароце: маўляў нехта паведаміў у міліцыю, што ён абражае чыноўнікаў. Але каго канкрэтна і якім чынам — невядома, падкрэсьлівае Кузьмянкоў.
«Я некалькі разоў зьвяртаўся ў Аршанскі райвыканкам праз адмысловую форму на сайце. Паведамляў пра праблемы на прадпрыемствах, пра хібы ў працы камунальных службаў. Заўжды ўважліва перачытваў, што пішу, і абсалютна ня меў на мэце, каб абразіць кагосьці асабіста. Мае звароты я бачыў раздрукаванымі ў сьледчага, але мне іх не паказвалі. Нібыта ў гэтых допісах і ёсьць абразы ад майго імя», — сказаў Раман Кузьмянкоў.
Апошні раз ён напісаў у форме для зваротаў, што зьбіраецца зладзіць аднаасобны пікет на знак пратэсту супраць малых заробкаў. Пікет адбыўся 14 траўня, Кузьмянкова затрымалі і ў той жа дзень завезьлі ў суд. Судзьдзя Юлія Хаткевіч аштрафавала яго на 490 рублёў (20 базавых велічынь).
У жыхара Дуброўна таксама забралі аргтэхніку, бо ён нібыта абразіў пракурора
Падобная гісторыя здарылася зь Міхаілам Чамуракам, жыхаром Дуброўна — суседняга з Воршай райцэнтру. 4 траўня ў яго правялі ператрус і забралі працэсар ад стацыянарнага кампутара і ноўтбук, які належыць ягонай маці-пэнсыянэрцы. У гэтым ноўтбуку захавана ўся інфармацыя, неабходная для прадпрымальніцкай дзейнасьці, але гэта нікога не спыніла, кажа Міхаіл.
«Мне заявілі, што вядзецца праверка па заяве, нібыта я абразіў пракурора раёну ў "Аднаклясьніках". Дык прычым тады кампутар, калі ўсё відаць у сацыяльнай сетцы? Але ўсё-ткі забралі. Пасьля мяне ператрус правялі і ў хаце маёй маці. Яна інвалід 2-й групы, расхвалявалася, падняўся ціск, пакуль у яе нешта шукалі па шафах, на кухні, пільна разглядалі пральную машыну. У выніку забралі некалькі дыскаў з сямейным фотаархівам», — апавёў дубровенскі актывіст.
Абодва ператрусы — у Воршы і ў Дуброўне — яднае адна акалічнасьць: парушаючы заканадаўства, міліцыянты не пакінулі дакумэнтаў пра забраныя рэчы.
Былая настаўніца Сьвятлана Дзьмітрыеўна Чамурака гаворыць, што напісала заяву на імя начальніка Дубровенскага РАУС:
«Напісала, што ноўтбук практычна скралі — у мяне ж доказаў няма, што яго забралі падчас ператрусу ў сына. Мне адказалі, што ноўтбук накіравалі ў Віцебск, і цяпер яго лёс будзе вырашаць абласная ўправа МУС».
Аршанец Раман Кузьмянкоў таксама зьбіраецца патрабаваць афіцыйных дакумэнтаў на забраныя рэчы.
