Кіраўнік Расеі Ўладзімір Пуцін, седзячы за стырном грузавіка, асабіста ўзначаліў першую калёну будаўнічай тэхнікі, якая накіроўваецца па новым мосьце да анэксаванага Крыму.
Так званы Крымскі мост злучае анэксаваны Крым з тэрыторыяй Расеі. Яго будаўніцтва пачалося ў 2015 годзе. Генэральным падрадчыкам стала кампаніяя «Стройгазмонтаж» расейскага мільярдэра Аркадзія Ратэнберга, якога называюць блізкім сябрам Пуціна. Афіцыйны кошт дзяржаўнага кантракту амаль 230 мільярдаў расейскіх рублёў (3,6 млрд $).
Як перадае агенцтва РИА Новости, мост стаў самым доўгім у Эўропе (19 кілямэтраў). Прапускная здольнасьць пераходу — 40 тысяч аўтамабіляў і 47 пар цягнікоў у суткі, 14 мільёнаў пасажыраў і 13 мільёнаў тон грузу ў год.
Аўтамабільны рух афіцыйна запусьцяць заўтра, 16 траўня, а першыя цягнікі паедуць не раней за 2019 год. Для аўтамабіляў выдзелена па дзьве паласы ў кожны бок, дазволеная хуткасьць — 90 км/г.
Праехаўшы па мосьце разам з будаўнікамі, Пуцін выступіў з урачыстай прамовай. Ён назваў гэты дзень гістарычным і падзякаваў ня толькі будаўнікам, але і сапёрам, якія «адказна выконвалі свае абавязкі».
