У Ерусаліме сёньня ўрачыста адкрылі пасольства ЗША. Падчас урачыстай цырымоніі Джарэд Кушнер, адмысловы пасланьнік ЗША на Блізкім Усходзе і зяць прэзыдэнта Дональда Трампа, узгадаў пра краіну сваіх продкаў — Беларусь.
«Я сёньня тут — горды амэрыканец і ўнук людзей, якія перажылі Галакост. Падчас Другой усясьветнай вайны мае продкі Рая і Ёзаф Кушнеры ўцяклі са свайго дому ў беларускі лес, каб пазьбегнуць сьмерці ад нацыстаў. Ім неяк удалося перанесьці жахі і выжыць. Пасьля вайны яны пабудавалі новае жыцьцё ў Амэрыцы — маяку надзеі і краіне бязьмежных магчымасьцяў», — сказаў старэйшы дарадца Белага дому.
Кушнер дадаў, што здымкі сваіх бабулі і дзеда ён трымае на працоўным стале ў Белым доме.
Дзед і бабуля Джарэда Кушнера паходзяць з Наваградку і Карэлічаў, што ў Гарадзенскай вобласьці. Рая Кушнер нарадзілася і жыла ў Наваградку, а Джозэф (Ёзаф) паходзіў з Карэлічаў. Пасьля вайны ў 1945 годзе яны эмігравалі ў ЗША.
Джарэдаў бацька, амэрыканскі мільярдэр Чарльз Кушнер, быў у Наваградку ўжо некалькі разоў, а першы раз у 1989 годзе разам з сваёй маці, якая там нарадзілася. Менавіта яна апавяла яму гісторыю жыцьця іхнай сям’і, паказала, дзе быў іх дом, дзе гета, зь якога ў вайну яна праз тунэль уцякла разам з маці і дзедам, і як перажыла Галакост у Налібацкай пушчы.