У Боткінскай лякарні ў Маскве памёр Сяргей Маўродзі — заснавальнік фінансавай піраміды «МММ». Яму было 62 гады. Як піша «МК», Маўродзі напярэдадні быў шпіталізаваны з аўтобуснага прыпынку. Ён скардзіўся на болі ў сэрцы, «хуткую» выклікаў мінак.
Выратаваць яго не ўдалося — сёньня раніцай ён памёр. Telegram-канал Mash піша, што «лекараў чамусьці насьцярожылі абставіны яго сьмерці, — яго цела накіравана ў судовы морг для ўскрыцьця».
На пачатку 90-х Маўродзі стварыў фінансавую піраміду «МММ» ахвярамі якой сталі ад 10 да 15 млн чалавек. За гэтыя махінацыі яго прысудзілі да 4,5 гадоў пазбаўленьня волі і ў 2007 годзе ён вызваліўся. У 2011 годзе ён зноў стварыў новую піраміду, але ўжо з назвай «МММ-2011». Яна пратрымалася некалькі месяцаў. У 2012 ён стварыў яшчэ адну, пасьля чаго на яго завялі крымінальную справу.
У 2016 годзе ён вырашыў выйсьці на рынак крыптавалют і стварыў сваю крыптавалюту Mavro.
