«Гэтае сьцьвярджэньне расейскага міністра замежных спраў Лаўрова абсалютна абсурднае. Будапэшцкі мэмарандум патрабуе ад Масквы не выкарыстоўваць супраць Украіны і не пагражаць любой сілай — ня толькі ядзернай зброяй. Лаўроў не дурны, ён гэта ведае», — напісаў Стывен Пайфэр у Twitter.
15 студзеня кіраўнік МЗС Расеі Сяргей Лаўроў заявіў, што Масква не парушала Будапэшцкага мэмарандуму. Пры гэтым расейскі міністар спаслаўся на тое, што яго краіна не парушыла аднаго з патрабаваньняў дакумэнту — аб непрымяненьні да Ўкраіны ядзернай зброі або пагроз ужыць такую зброю.
«Нагадаю, што мы так і не ўжывалі і не пагражалі Ўкраіне ядзернай зброяй, таму ніякага парушэньня мэмарандуму не адбылося», — сьцьвярджаў Лаўроў.
Пры гэтым ён таксама заявіў, што Расея прызнае тэрытарыяльную цэласнасьць Украіны, але толькі «ў тых межах, якія склаліся» пасьля захопу Масквой украінскага Крыму і заяў аб уступленьні паўвострава ў Расею ў пачатку 2014 году.
Будапэшцкі мэмарандум ядзерныя краіны заключылі ў 1994-м з Украінай і Беларусьсю для гарантаваньня іхнай бясьпекі пасьля адмовы Кіева і Менску ад савецкай ядзернай зброі, якая належала ім. Пасьля захопу Крыму і пачатку гібрыднай агрэсіі Расеі на Данбасе іншыя бакі дакумэнту не абаранілі Ўкраіну, ужыўшы супраць Масквы дыпляматычныя і санкцыйныя захады.
У Мэмарандуме краіны-ўдзельніцы «пацьвярджаюць іхныя абавязаньні ўстрымлівацца ад пагрозы сілай або яе прымяненьня супраць тэрытарыяльнай цэласнасьці або палітычнай незалежнасьці» Ўкраіны і Беларусі, і што ніякая іхная зброя ніколі ня будзе выкарыстоўвацца супраць гэтых дзяржаў, акрамя мэтаў самаабароны або любым іншым чынам, згодна са Статутам Арганізацыі Аб’яднаных Нацый.
Дакумэнт пацьвярджае павагу незалежнасьці і сувэрэнітэту, існуючыя межы Ўкраіны і Беларусі па стане на падпісаньне мэмарандуму 1994 году.
