3 студзеня ў Cьветлагорску трое хлапчукоў, якім ад нараджэньня 3–4 гады, самі пакінулі дзіцячы садок, прайшлі каля 1 кілямэтра да станцыі і селі ў прыгарадны цягнік. Яны ад’ехалі зь дзясятак кілямэтраў, калі іх заўважыў памочнік машыніста.
«Прыходзіць памочнік і кажа, што ў вагоне малалеткі, — сказаў журналістам машыніст Яўген Новік. — Адразу падумаў, можа падлеткі кураць дзе ў тамбуры. Аказалася, зусім малыя. Сказалі, што едуць у іншы горад ці да маці, ці да бабулі. Калені былі запэцканыя — відавочна, запаўзалі ў вагон на каленях. На прыпынку Мормаль хацелі вылезьці і зьбегчы».
Аднак памочнік машыніста хлопчыкаў затрымаў. На прыпынку іх ужо чакалі сьветлагорскія міліцыянты, якія атрымалі паведамленьне пра «ўцекачоў» ад чыгуначнікаў.
Анціп — чатырохгадовы хлопчык — расказаў, што яны з двума сябрамі выбеглі першымі з групы на вуліцу. Трохгадовы Дзіма прапанаваў пайсьці на вакзал і паехаць туды, дзе вырабляюць прыгожыя бутэлькі. Чыгунку перайшлі праз рэйкі, залезьлі ў вагон дызэля, які ішоў на Жлобін.
Як забраліся ў цягнік? «Падняў нагу і залез», — адказаў Анціп.
Ягоная маці дзівіцца, што ніхто з дарослых не спыніў хлопчыкаў па дарозе.
Выхавацельку групы і загадчыцу дзіцячага садка № 21 4 студзеня звольнілі з працы з фармулёўкай «за неналежнае выкананьне прафэсійных абавязкаў».
