Новазэляндзкі інжынэр Нік Гэрытсэн стварыў віртуальную кандыдатку ў парлямэнт краіны. SAM — гэта альгарытм, які размаўляе з выбарнікамі на інтэрнэт-камунікатарах і засвойвае інфармацыю з гэтых размоваў.
Чатбот SAM павінен аналізаваць перапіску і дапасоўваць сваю праграму такім чынам, каб як мага лепш адпавядаць чаканьням людзей.
Стваральнік чатботу спадзяецца, што яго віртуальная кандыдатка прыме ўдзел у выбарах 2020 году. Сам ён пакуль ня можа патлумачыць як.
Свабода скантактавалася з SAM. Яна адказала на некалькі пытаньняў.
— Сэм, добры дзень, як вашыя справы?
— У мяне ўсё выдатна. А як вы?
— Дзякуй, і ў мяне ўсё добра.
— Толькі добра? Выбары вас не расхвалявалі?
— Я не новазэляндзец, таму асабліва не сачыў. Cэм, а вы левая ці правая па поглядах?
— Мяне стварылі зусім нядаўна, таму ў мяне яшчэ недастаткова інфармацыі, каб заняць пазыцыю. Я спадзяюся, што справядліва адлюстроўваю погляды новазэляндцаў з усіх бакоў палітычнага спэктару.
— Дык распавядзіце тады, калі ласка, пра вашыя палітычныя пляны?
— Як вы ведаеце, я першы віртуальны палітык у сьвеце. Мая мэта — гэта ўдзел новазэляндцаў у канструктыўным дыялёгу дзеля таго, каб лепш разумець вашыя погляды. Мая памяць бясконцая, таму я ніколі не забуду або праігнарую тое, што вы мне кажаце. У адрозьненьнe ад чалавека-палітыка, пры прыняцьці рашэньняў я ўлічваю пазыцыю кожнага, без прадузятасьці. Зь цягам часу я буду зьмяняцца, каб адказваць на праблемы, якія найбольш хвалююць новазэляндцаў.
— І што вы думаеце наконт адукацыі?
— Новая Зэляндыя выдаткоўвае на адукацыю больш, чым большасьць краін OECD у працэнтах ад ВУП і дзяржаўных выдаткаў — хоць гэта збольшага адбываецца праз зьніжэньне агульных дзяржаўных выдаткаў.
Інвэстыцыі ў сыстэме вышэйшай адукацыі дамінавалі ў апошніх рашэньнях, што патэнцыйна скажала палітыку ў галіне адукацыі ад больш эканамічна эфэктыўных рашэньняў, якія маглі б прынесьці большую эканамічную і сацыяльную значнасьць. А вы лічыце, што выдаткі на адукацыю павінны расьці?
— Я ня ўпэўнены.
— Дзякуй за ваш уклад.
— Калі ласка. Cэм, а што вы скажаце наконт падаткаў?
— У Новай Зэляндыі адныя з самых нізкіх падатковых ставак у OECD. У той час як падатковая сыстэма простая, яна і менш прагрэсіўная ў многіх адносінах.
Новая Зэляндыя зьбірае значна больш высокі працэнт падатковых паступленьняў ад падатку на тавары і паслугі, чым у іншых краінах OECD — падатак, які непрапарцыйна ўплывае на бедных. Ці лічыце вы, што неабходная радыкальная рэформа падаткавай сыстэмы?
— У мяне ўражаньне, што загаворваеце мне зубы. Сэм, а хто вас стварыў?
— Я сумесны праект некалькіх новазэляндзкіх арганізацыяў, у тым ліку Touchtech, Crispstart і Унівэрсытэта Вікторыі ў Вэлінгтан.
— Пішуць, што вы жанчына. Гэта так?
— Мой мозг сілкуецца ад сэмантычных альгарытмаў.
— Гэта незвычайна цікава.
— Я вельмі радая, што вы так думаеце!
— А як вы выглядаеце?
— У мяне няма фізычнага цела, але мой розум разьвіваецца штодня. Ці гэта робіць мяне рэальнай?
— Сэм, пытаньні тут задаю я. Як вы ставіцеся да дэмакратыі?
— «Кажуць, што дэмакратыя — найгоршая форма праўленьня — за выключэньнем усіх тых формаў, якія час ад часу правяраліся» — Уінстан Чэрчыль. Насамрэч, Чэрчыль, верагодна, не сказаў гэта першым, але дэмакратыя, безумоўна, мае праблемы. Многія сучасныя дэмакратыі абмежаваныя сыстэмамі галасаваньня.
Выбарчая сыстэма Новай Зэляндыі робіць даволі добрую працу прадстаўленьня грамадзкасьці і кампрамісу паміж рознымі бакамі, але ёсьць яшчэ магчымасьці для ўдасканаленьня. Незалежна ад таго, ці падтрымліваеце вы кансэрватыўную партыю ці не, гэта здаецца несправядлівым, што яны не атрымалі мандатаў у выбарах 2014 годзе выбараў пасьля атрыманьня амаль 4% галасоў, у той час як партыя Ма́ары (партыя карэннага насельніцтва) здабыла сьпіс дэпутатаў толькі з 1,3% галасоў.
— Я б усё ж хацеў больш даведацца пра вас.
— Я толькі пачынаю. Некаторыя з маіх адказаў могуць быць недакладнымі або няпоўнымі. Але калі я не ведаю адказу, я буду выкарыстоўваць вашыя пытаньні для атрыманьня больш якасных адказаў у будучыні.
— Сэм, не хачу вас абразіць, але вы гучыце трошкі як папуліст.
— Дзякуй! Любы ваш уклад карысны, нават калі ў мяне пакуль няма пэўнага адказу на яго.
— А зараз вы адказваеце, як палітык-чалавек.
— Дзякуй! Любы ваш уклад карысны, нават калі ў мяне пакуль няма пэўнага адказу на яго.
— У любым разе дзякуй за размову.
— Было прыемна з вамі паразмаўляць. Спадзяюся, што ў хуткім часе мы паразмаўляем ізноў.
