Нацыянальны вышэйшы суд Гішпаніі выдаў міжнародны ордэр на арышт адхіленага ад улады кіраўніка Каталёніі Карлэса Пудждэмона і чацьвярых экс-міністраў ягонага кабінэту. Супраць іх выставілі абвінавачаньні ў бунце і растраце бюджэтных сродкаў. Мадрыд накіраваў запыт на затрыманьне 5 палітыкаў у пракуратуру Бэльгіі.
Раней у пятніцу Карлэс Пудждэмон заявіў, што гатовы выставіць сваю кандыдатуру на рэгіянальных выбарах, але кампанію будзе весьці з-за мяжы. Паводле палітыка, дзякуючы глябалізацыі «перадвыбарчую кампанію можна весьці адкуль заўгодна». Пудждэмон адзначыў, што лічыць сябе і сваіх прыхільнікаў «легітымным урадам» Каталёніі.
30 кастрычніка Карлэс Пудждэмон і пяцёра чальцоў ураду Каталёніі зьехалі ў Бэльгію. На гэтым тыдні гішпанскі суд арыштаваў васьмярых зь дзевяці звольненых міністраў ураду Каталёніі ў справе пра спробу аўтаноміі аддзяліцца ад каралеўства. Пудждэмона выклікалі ў суд у якасьці сьведкі ў справе пра мяцеж. Але палітык застаўся ў Бэльгіі і прапанаваў даць паказаньні празь відэасувязь. У Мадрыдзе на гэткія ўмовы не пагадзіліся.
Пасьля рэфэрэндуму пра незалежнасьць Каталёніі цэнтральныя ўлады Гішпаніі ўвялі ў правінцыі наўпроставае кіраваньне. Мадрыд распусьціў парлямэнт Каталёніі і звольніў мясцовы ўрад. На 21 сьнежня ў аўтаноміі прызначаны рэгіянальныя выбары.
