15 слухачоў лекцыі Пятра Рабава «Лібэртарная сацыяльная думка апошняй траціны XX — пачатку XXI cтагодзьдзя», якая адбывалася ў гарадзенскім «Цэнтры гарадзкога жыцьця» выпусьцілі, трое дзяўчат адмовіліся здаваць адбіткі пальцаў — іх трымаюць у пастарунку.
Усяго было затрымана 19 чалавек разам з лектарам Рабавым, пра ягоны лёс на гэты час нічога невядома.
Ужо амаль а 21-й гадзіне ўвечары з Ленінскага РАУС пачалі выпускаць затрыманых падчас лекцыі Пятра Рабава «Лібэртарная сацыяльная думка апошняй траціны XX — пачатку XXI cтагодзьдзя», якая адбывалася ў гарадзенскім «Цэнтры гарадзкога жыцьця». З пастарунка выйшлі 15 чалавек. У пастарунку застаюцца тры дзяўчыны, якія адмовіліся здаваць адбіткі пальцаў. Нічога невядома пра лёс лектара Рабава.
Як затрымлівалі
Адзін з хлопцаў, які назваўся Васіль, распавёў пра падрабязнасьці іх затрыманьня падчас лекцыі:
— Лекцыя яшчэ толькі пачалася і лектар нічога не пасьпеў сказаць, як прыйшлі АМАПаўцы і ўсіх затрымалі. Пачалі спраўджваць дакумэнты, нашыя рэчы, пыталіся хто нас сюды паклікаў і ці не набывалі мы тут ніякай літаратуры. А потым павезьлі ў пастарунак. Сярод затрыманых былі студэнты, магістранты і нават выкладчык. У пастарунку склалі пратаколы апытаньня, узялі адбіткі пальцаў і сфатаграфавалі — звычайная працэдура. Нам патлумачылі, што лекцыя праходзіла без дазволу, а дакладней незаконна. Лектара Рабава адвялі некуды асобна і мы яго болей ня бачылі. Ведаем, толькі , што не адпускаюць трох дзяўчат — яны адмовіліся здаваць адбіткі пальцаў.
Без адбіткаў не выпускаюць
Свабодзе праз тэлефон удалося пагаварыць з адной з дзяўчат, якую трымаюць у пастарунку. Яе завуць Маргарыта, яна распавяла, што разам з сяброўкамі Алінай і Верай адмовіліся здаваць адбіткі пальцаў і ім сказалі, што яны прабудуць у пастарунку да раніцы.
— Мы патрабавалі, каб нам дакумэнтальна пацьвердзілі неабходнасьць здачы адбіткаў пальцаў. Нам адмовіліся паказаць такія дакумэнты, а мы таксама не пагадзіліся здаваць адбіткі пальцаў. Мы лічым, што нас затрымалі беспадстаўна. Прычыну затрыманьня нам не патлумачылі і трымаюць ужо чатыры гадзіны. Пра лектара Рабава нам таксама нічога невядома, мы яго ня бачылі пасьля таго, як нас прывезьлі ў пастарунак.
***
Пётр Рабаў — сучасны расейскі анархіст, удзельнік «Аўтаномнага дзеяньня». Кандыдат філязофскіх навук, дацэнт катэдры філязофіі Маскоўскага пэдагагічнага дзяржаўнага унівэрсытэта імя Леніна. На ягонай старонцы «Вконтакте» паведамляецца, што ён плянаваў 9 кастрычніка ў Горадні дзьве лекцыі: «Лібэртарная сацыяльная думка апошняй трэці XX — пач. XXI стст.» і «Нефармальны рух сучаснай Беларусі (1991- 2010)»
