Экспэрты ААН устанавілі, што ў ходзе сірыйскага канфлікту 33 разы ўжывалася хімічная зброя.
Як паведаміла 6 верасьня Камісія ААН па расьсьледаваньні хімічных атакаў у Сырыі, 27 разоў хімічную зброю ўжывалі сілы рэжыму Башара Асада. Прыкладам, у горадзе Хан-Шэйхун у красавіку сёлета больш за 80 мірных жыхароў загінулі ў выніку бамбаваньня снарадамі, якія зьмяшчалі атрутны газ зарын. Дамаск сьцьвярджае, што падчас яго авіяўдару бомба трапіла ў склад хімічных снарадаў, вырабленых паўстанцамі.
Спэцыяльны пасланьнік ААН па Сырыі Стафан дэ Містура заявіў, што грамадзянскую вайну не ўдалося выйграць нікому. Ён выказаў меркаваньне, што сырыйскі ўзброены канфлікт амаль завершаны — галоўная праблема ў тым, ці здольны рэжым Башара Асада пачаць сапраўдны палітычны працэс, і ці здольная апазыцыя быць адзінай і выявіць дастаткова рэалізму, каб прызнаць, што ёй не ўдалося атрымаць перамогу над Дамаскам.
За шэсьць з паловай гадоў вайны ў Сырыі, паводле зьвестак ААН, загінулі больш за 450 тысяч чалавек, мільёны жыхароў краіны сталі ўцекачамі.
