Разьвітаньне з Алесяй Фурс (Умпіровіч). Фотагалерэя

У Паставах разьвіталіся зь сябрам беларускіх патрыётаў Алесяй Фурс (Умпіровіч). Яна памерла на 92-м годзе жыцьця, апошнія гады цяжка хварэла. У 1943, у часе вучобы ў Пастаўскай настаўніцкай сэмінарыі Алеся ўступіла ў Саюз Беларускіх Патрыётаў, 25 сакавіка 1946 году для цырымоніі прысягі сяброў арганізацыі на вернасьць Беларусі намалявала «Пагоню». У 1948 была арыштаваная і прысуджаная да 25 гадоў канцлягеру ў Мардовіі. У 1956, пасьля вызваленьня, пабралася шлюбам з Антонам Фурсам, жылі ў Казахастане. У 1982 вярнуліся на радзіму, пасяліліся ў Паставах. Рэаблітаваная ў 1993 годзе.