Пуцін лічыць, што пастаўкі нафты ў Беларусь неабходна ўвязаць з выкарыстаньнем расейскай транспартнай інфраструктуры.
Прэзыдэнт Расеі Ўладзімер Пуцін лічыць неабходным прапісваць строгае абавязаньне для беларускіх НПЗ, каб тыя выкарыстоўвалі расейскую інфраструктуру падчас перавозкі нафтапрадуктаў.
«Гэта трэба абмяркоўваць у больш шырокім фармаце, — цытуе Пуціна „Интерфакс“. — На беларускіх НПЗ перапрацоўваецца наша нафта (іншай там няма і наўрад ці зьявіцца), таму трэба гэта запакетаваць: атрыманьне нашай нафты ў наўпроставай прывязцы да нашай інфраструктуры», — сказаў Пуцін на нарадзе пра разьвіцьцё транспартнай інфраструктуры Паўночна-Заходняга рэгіёну Расеі.
Кіраўнік ААТ «Российские железные дороги» Алег Белазёраў далажыў Уладзімеру Пуціну, што беларускія НПЗ адмаўляюцца ад паслуг расейскай чыгункі на карысьць інфраструктуры краінаў Балтыі, нягледзячы на зьніжкі ў Расеі. Пры гэтым у Менску спасылаюцца на доўгатэрміновыя кантакты.
«Па нафтаналіве мы далі 50-працэнтную зьніжку для перавозкі зь беларускіх заводаў, але тыя пакуль не выкарыстоўваюць ні Усць-Лугу, ні Санкт-Пецярбург, а едуць у рэспублікі Прыбалтыкі. Мы вядзём дыскусію, яны кажуць, што ў іх доўгатэрміновыя кантракты на гэтую тэму заключаныя, але мы стараемся выстройваць зь імі дыялёг», — сказаў Белазёраў.
