Ці варта верыць уладзе, калі яна гаворыць па-беларуску? Ці азначае выступ Макея паварот да беларусізацыі?
Юры Дракахруст лічыць, што варта верыць, бо....
- Мяккая беларусізацыя пачалася ня з выступу Макея ў мінулую суботу, гэта новая пасьлякрымская рэальнасьць. Збольшага гэта хутчэй дазвол прыватным беларускім ініцыятывам (якога, аднак, раней не было). Хаця ёсьць і прыклады ня толькі дазволу, але і акцэптацыі ўладай падобных ініцыятываў, найбольш яскравы прыклад — вышыванкі.
- У беларускім грамадзтве ёсьць людзі, апантаныя беларушчынай. Як ёсьць і людзі, апантаныя ідэямі «рускага сьвету». І ёсьць беларускі мэйнстрым, збольшага рускамоўны, але які мае беларускі сантымэнт. Улада спрабуе знайсьці балянс паміж імпульсамі ад гэтых розных групаў грамадзтва.
- Ці ёсьць Макей шчырым дэмакратам? А ці быў у нейкім 1985 годзе шчырым дэмакратам Гарбачоў? Ня быў. Тады, дык пэўна, хацеў адно крыху палепшыць сацыялізм. Але вынік атрымаўся значны.
- Лукашэнка ў 94-м абяцаў вярнуць СССР, зараз кажа, што незалежнасьць — сьвятыня. А калі памянялася? Гэтак жа і з беларусізацыяй будзе.
- «Мяккая беларусізацыя» падобная на вяртаньне Сталіным пагонаў у 1943 годзе. Гэта было прадаўжэньнем у мінулае сваёй легітымнасьці, усьведамленьнем сябе нашчадкам ня толькі Леніна, але і рускіх цароў.
- У кароткатэрміновай пэрспэктыве дыктатар, які сёньня перайшоў з расейскай на беларускую, ня робіцца лепшым. Але калі нават цяперашняя аўтарытарная ўлада пачынае прымаць нейкія нацыянальныя рэчы, то гістарычна гэта станоўчая зьява.
Дзьмітры Гурневіч лічыць, што ня варта верыць, бо...
- Усе крокі «мяккай беларусізацыі» — касьмэтычныя і ўмоўныя.
- Вышыванкі — форма, якая паклікана замяніць зьмест.
- Часта беларуская мова робіцца індульгенцыяй, калі чыноўнік гаворыць па-беларуску, яму даруюць усе правіны.
- Беларуская ўлада 10 гадоў марудзіць з «картай беларуса». Макей на зьезьдзе адказаў: «По Дерибасовской гуляют постепенно». 10 гадоў яны «гуляюць», ня могуць увесьці.
- Калі я бачу палітыка, які кажа па-беларуску, гэта ў маіх вачах яму плюс, але я ацэньваю яго паводле яго каштоўнасьцяў і дзеяньняў. Калі заўтра Лукашэнка і яго міністры загавораць па-беларуску, для мяне гэта не паўплывае на тое, што было да таго. Я супраць дыктатуры.
- Няважна, на якой мове адсутнічае дэмакратыя.
