У Беларусі плянуюць пабудаваць новы трактарны завод. Пра гэта 24 траўня паведаміў намесьнік прэм’ер-міністра Ўладзімер Сямашка, перадае БелТА.
«Кіраўнік холдынгу „Амкадор“ Аляксандр Шакуцін падрыхтаваў і ўнёс прапанову пра тое, што ў шэрагу іншых інвэстыцыйных праектаў ён будзе ствараць вытворчасьць аўтатрактарнай і камунальнай тэхнікі. Былі розныя меркаваньні і пазыцыі з гэтай нагоды, але я асабіста падтрымліваю гэты праект», — сказаў віцэ-прэм’ер.
На ягоную думку, гэта створыць канкурэнтнае асяродзьдзе, у тым ліку і для МТЗ.
На рэалізацыю праекту спатрэбіцца каля $ 300-350 млн. Але Сямашка адзначыў, што гэта будуць замежныя сродкі.
«Гэта будуць крэдыты замежных банкаў. Сакрэту няма, асноўная лінія — гэта будуць кітайскія крэдыты», — удакладніў ён.
Завод плянуецца пабудаваць за тры гады пасьля прыняцьця канчатковага рашэньня ў крэдытаваньні.
Тым часам, паводле зьвестак Белстату на 1 сьнежня 2016 году, толькі на складах у Беларусі стаіць 4400 трактароў.
