Сябра руху «За свабоду» Вадзім Бабін даведаўся, што быў завочна аштрафаваны на 25 базавых велічыняў (575 рублёў) за «парушэньне правілаў добраўпарадкаваньня і ўтрыманьня населеных пунктаў»: ён нібыта наляпіў стыкер з гербам «Пагоня» на слуп у Карэлічах, паведамляецца на сайце руху.
Бабін кажа Свабодзе, што пра разгляд справы яму не паведамлялася — ён толькі даведаўся пра вынікі, атрымаўшы 16 красавіка ліст з пастановай аб штрафе, прызначаным адміністрацыйнай камісіяй Наваградзкага райвыканкаму на чале зь Мікалаем Піваварчыкам.
Бабін сьцьвярджае, што налепкі не ляпіў. 27 сакавіка ён быў асуджаны за нібыта непадпарадкаваньне міліцыі на 7 сутак арышту. Яшчэ тады міліцыянты сьцьвярджалі, што шукалі чалавека, які наляпіў стыкер, а Бабін нібыта адмовіўся належным чынам прад’явіць дакумэнты.
«Я так разважаю, што прасьцей заплаціць штраф, нічога такога ня будзе», — кажа Бабін. Прыгадваючы «багаты досьвед» адміністрацыйных спраў супраць яго, ён не спадзяецца на скасаваньне штрафу.
