У дачыненьні да экс-прэмʼера і кандыдата ў прэзыдэнты Францыі ад Партыі рэспубліканцаў Франсуа Фіёна афіцыйна пачата расьсьледаваньне ў справе аб фіктыўным працаўладкаваньні, паведаміла пракуратура. Тое, што справа адкрыта, таксама пацьвердзіў адвакат палітыка.
Le Figaro піша, што афіцыйна Фіёна абвінавачваюць па артыкулах аб «растраце, дапамозе ва ўтойваньні злачынства і злоўжываньні дзяржаўнымі сродкамі».
Фіёна абвінавачваюць у тым, што ён незаконна ўладкаваў на працу жонку Пэнэлоёпу. Яна лічылася памочнікам палітыка ў той час, як ён быў дэпутатам парлямэнту, і атрымлівала зарплату памерам 3677 эўраў у месяц, хоць, паводле дадзеных сьведак, ніякіх працоўных абавязкаў не выконвала. Такім чынам яна, паводле падлікаў, зарабіла каля 1 млн. эўраў.
Сама жанчына ў інтэрвію заявіла, што сапраўды выконвала даручэньні мужа і атрымлівала за гэта грошы, але яны былі сумленна заробленыя. Фіён на мінулым тыдні таксама зрабіў заяву, у якой падкрэсьліў, што не парушаў закону.
У Фіёна праз скандал з фіктыўным працаўладкаваньнем ужо развалілася перадвыбарчая каманда: падаў у адстаўку яго прэс-сакратар, пра зыход заявіў кіраўнік штабу. Але сам палітык працягваў настойваць, што ніякія абвінавачаньні ў карупцыі не перашкодзяць яму пайсьці на выбары, і адмаўляўся здымаць сваю кандыдатуру.
Тым ня менш, з прычыны скандалу яго рэйтынгі апошнім часам падалі, і ён паводле апытаньняў прайграваў і цэнтрысту Эманюэлю Макрону, і нацыяналістычнай кандыдатцы Марын Лё Пэн.
