Генэральны пракурор Украіны Юры Луцэнка на прэс-канфэрэнцыі ў Кіеве 15 лютага паведаміў, што за ваенныя злачынствы ў Данбасе ад пачатку там узброенага канфлікту асуджаны 41 чалавек. 28 зь іх — грамадзяне Расеі, астатнія — удзельнікі незаконных узброеных фармаваньняў так званых «ДНР» і «ЛНР».
Апошні прысуд быў вынесены грамадзяніну Расеі 8 лютага сёлета Торацкім гарадзкім судом (Данецкая вобласьць). Ураджэнца Масквы, былога супрацоўніка праваахоўных органаў РФ (прозьвішча яго не называецца) прысудзілі да 11 гадоў турмы з канфіскацыяй маёмасьці за ўдзел у вайне супраць Украіны.
